Ватан уьбхрурин Йигъаз бахш вуди, 22-23-пи февралиъ Хив райондиъ РД-йин Халкьдин Собраниейин депутат Алавудин Мирзабалаевдин ва Хив райондин глава Ярмет Ярметовдин пешкешар бадали волейболиан талитар кIули гъухну. Му йигъан тялукь талитар гъахувал райондиъ 2006-пи йислан мина аьдатназ илтIибкIна.
Улупнайи талитар гъахбан асас метлебра жямяаьтлугъдин арайиъ волейбол артмиш апIувал, му уйнамишар гъахбаан жигьиларин устадвал за апIувал ву.
Талитар ккергъайиз улихьна, дурарин иштиракчйирихьинди илтикIну, дидин тешкилатчйири, РД-йин Правительствойин ва Главайин администрацияйин аьхюрин заместитель Нюсрет Уьмаровди ва саб жерге дуфнайи хялари Ватан уьбхрурин Йигъ къайд апIбан метлеблуваликан гъапну.
Маракьлу уйнамишарин натижайиъ гъалибвалин сабпи йишваз ГъуштIил гъулан жигьилар лайикь гъахьну, 2-пи ва 3-пи йишварин сагьибар Хирижв ва Хив гъуларин волейболистар гъахьну. Гъалибчйир ва уйнамишар гъахбаъ лишанлу гъахьи спортсменар тялукь дережайин дипломариинди ва пулин пешкешариинди лишанлу гъапIну.
