Машгьур ашукь Ярмет Мирзаферов 1940-пи йисан 1-пи мартдиъ Табасаран райондиъ Гюгьрягъ гъулаъ бабкан гъахьну. 1956-пи йисан Гюгьрягъярин 7 йисандин мектеб ккудубкIну, думу Дербент шагьриъ айи Дагъустандин гъулан мяишатдин техникумдин агрономвалин курсарик урхуз кучIвну.
Техникум ккудубкIбалан кьяляхъ, Ярмет Мирзаферов «Табасаранский» совхоздиъ бригадирди лихуз хъюгъру. 1973-пи йислан мина гъийин йигъазкьан думу Гюгьрягъярин гъулан культурайин Хулан директорди лихура. 1993-пи йисан дугъаз «Дагъустан Республикайин культурайин лайикьлу гъуллугъчи» кIуру ччвур тувну.
Ярмет Мирзаферов чаз туву гъуллугъ вахтниинди тамам апIру, аькьюллу, сабурлу инсан ву. Думу учвра лап абурлу хизандиан ву – дугъан абйир-бабар гъулаъ аьхю гьюрмат айи касар вуди гъахьну. Му касди юкьур веледра тербияламиш гъапIну.
Ярмет Аьлибалаевичдин намуслу зегьмет жюрбежюр пешкешариинди, дипломариинди, гьюрматнан грамот-йириинди лишанлу дапIна. Гьаци, 1981-пи йисан думу Табасаран райондиъ кIули гъубшу фольклорин сабпи фестивалин, 1988-пи ва 1990-пи йисари Мягьячгъала шагьриъ гъабхьи «Булагъ» кIуру фестивалин лауреатра гъахьну ва культурайин Министерствойин грамотайиинди лишанлура гъапIну. 1985-пи йисан Ватандин Аьхю дявдиъ гъалибвалин 40 йис хьпаз тялукь вуйи серенжемдиъ гьюрматнан грамотайин, 1985-пи йисан гъабхьи «Булагъ» кIуру фольклорин фестивалин гьюрматнан грамотайин сагьиб гъахьну.
Табасаран райондиъ аьхиримжи йисаризкьан Ярмет Мирзаферовдин иштирак’вал адру серенжем затра шулдайи. Дугъу гъидикIу шиърар ва апIурайи мяълийир вари читин уьмрикан вуйи.
Улихьна йигъари Табасаран райондин культурайин Хулан гъуллугъчйир ашукь Ярметдихьна, дугъан юбилей мубарак апIуз кIури, хяларди гъушну. Табасаран райондин культурайин, спортдин, туризмдин ва жигьиларин политикайин отделин начальник Аьбдулвагьаб Аьбдуловди, Ярмет Мирзаферов Табасаран райондин глава Мягьямед Къурбановдин терефнаан юбилейихъди тебрик апIури, дугъаз райондин главайин ччвурнахъан вуйи хилихъ хъапIру сяаьт ва грамота тувну (шиклиъ).
Юбилейиз бахш дапIнайи серенжем кIули гъабхурайир Табасаран театрин художник Аьбдурягьман Уьсманов вуйи. Дугъу чан терефнаан юбиляриз хъана аьхю хъуркьувалар ва ярхи уьмур ккун гъапIнийи. Серенжемдиъ гьацира Гюгьрягъ гъулан глава Ражаб Мамедовди, Сиртич гъулан глава Аьгьядуллагь Уьсмановди ашукьри гизаф йисари тамам гъапIу ляхниз заан кьимат тувнийи ва думу кIваантIан юбилейихъди тебрик гъапIнийи.
Саб хайлин йисари Табасаран райондин культурайин отделин начальникди гъилиху ва гьаммишан Ярмет Мирзаферовдихъди сабси концертариъ иштирак шули гъахьи Гъардашбег Къазимягьямедовдира машгьур ашукь юбилейихъди тебрик гъапIну. Дугъу чпи сатIиди гъуху серенжемарикан, жюрбежюр гьядисйирикан ктибт-нийи ва дустраз бахш вуди мяъли гъапIнийи.
Гюрюшдин аьхириъ Ярмет Мирзаферовди хялариз, учв гьяспикк ккаъну гъюбаз, чухсагъул гъапнийи.
