Гьюрматлу дишагьлийир!

Улубкьурайи хьадукран машквар – Варихалкьарин дишагьлийирин йигъ учвуз мубарак ибшри!
Дишагьлийи дюн’яйиз цIийи уьмур хура, хизандин чирагъ ктIубшвуз гъитрадар, чан хизан кьаза-балайихьан уьбхюра. Дишагьлийи хизандиз шадвал хури, хизандин гъайгъушнаъ ади, чан багахьлуйирин уьмур бахтлу апIура.
Гьаму хьадукран аку машквар учвухьна вуйи гьюрмат, манишин, ккунивал улупуз сабсан багьна ву. Гьамусдин деврин дишагьли, дадаси, хпирси, юлдашси, жямяаьтлугъ ляхнарин ужур иштиракчира ву. Сагъламвалин, яшайишдин, образованиейин, культурайин, алверчивалин, жямяаьтдиз уьл гьивбан цирклариъ лихурайидарин аьхюну пай дишагьлийир ву. Учву зигурайи зегьметназ, ичв пишекарвализ ва жавабдарвализ аьхю чухсагъул.
Гъи уьлкейиз читин вуйи вахтна учу хусуси метлеб айи дявдин операцияйиъ чпин ватандаш, ватанпервер буржи тамам апIури, жвуван Ватан уьбхюрайи эскрарин ва офицерарин дадйирихьна, хупарихьна илтIикIурача. Гъит, Аллагьу Тяаьлайи ичв багъридар ва ккунидар наан ашра сагъ-саламатди гъитри, гъит дурар гъалибвалра хьади, шлубкьан ухди чпин хизанарихьна кьяляхъ гъюри.
Аьзиз дишагьлийир! Ичв хулаъ гьарган мясляаьт, берекет, ккунивал ибшри, веледарихъан юкIв саламатди гъубзри, гьаму цIийи хьадукру учвуз шадвал хури, ичв кIваъ айи метлебар Аллагьди тамам апIри.