Апрелин 8-пи йигъан Урусатдин Федерацияйин Президент Владимир Путинди регионарин главйирихъди совещание кIули гъубхну. Думу совещаниейиъ уьлкейин Президент Урусатдин ватандашарихьна илтIикIну. Дугъан улхбаан асас пунктар туврача.
Гьюкуматди, коронавирусдиан аьзарлу гъахьидариз больницйириъ йишвар тешкил апIбан бадали, 33 миллиард манат жара гъапIну. Техника, ИВЛ ва реанимацияйин машинар масу гъадагъбан бадали, хъана 13 миллиард манатсана жара дапIна.
Правительствойи Центробанкдин иштирак’валиинди хьуд йигъандин арайиъ бизнесдиз аьлава кюмек тувбан программа гьязур дапIну ккунду. Сабпи нубатнаъди инсанар лихру йишвар уьрхру компанйириз кюмек тувди.
Мартдин садпи йигълан мина ляхин адарди гъуздариз, гьюкмари кюмек апIиди. Дурариз МРОТ-дин кьадарнаъди – 12130 манат бикарвалин пособие тувди.
Бизнесдин налогарин буржар жара вахтназ гъитбанди ву, яна кьандиси, цIи-цIибди тувуз ихтияр а.
Вахт улдубчIвурайи вари документарин, гьадму гьисабнаан паспортаринра, вахт давам апIиди.
Правительствойи кредит гъадабгънайидариз кредитар тувбан тятIилар яркьу апIбан месэла гьял апIбанди ву.
Коронавирусдиан аьзарлу духьнайидарихъди ляхин апIурайи медицинайин гъуллугъчйириз шубуб вазлин арайиъ аьлава пул тувди: духтрариз – 80 агъзур манат, фельдшерариз – 50 агъзур, марццишнан ляхнар тамам апIрудариз – 25 агъзур манат, медицинайин тяди кюмекнан духтрариз аьлава вуди – 50 агъзур манат, хъа медицинайин тяди кюмекнан машинар хъаърудариз – 25 агъзур манат.
Багарихьди гъюру 3 вазлин арайиъ йисар бегьем дархьи бицIидар айи хизанариз бицIирин кIулихъ аьлава вуди 3 агъзур манат тувди.
«Гъавриъ аза, гьарган юкьуб цалин айитI хьувал – гъагъи ляхин ву, инжик духьнайидар гизаф а. Хъа чара адар. Гьарур чан хулаъ гъузну ккунду. Сабур апIувал чарасуз лазим ву. Багарихьди гъюрайи кьюб-шубуб гьяфта коронавирусдихъди аькси женгнаъ гъагъидар хьиди, гьаддиз ихь сагъ’валихьна жавабдарвалиинди янашмиш шулхьа. Ихь жавабдарваликан ва къайда уьбхюваликан инфекцияйихъди вуйи женгнан натижа асиллу ву.
Уьзрихъди женгнаъ айи ва гьар йигъан жарадариз кюмек апIурайи духт-рариз чухсагъул. Вари улдубчIвуру, уьз-рин вахтра улдубчIвиди. Ихь уьлкейин кIул’ина думутIан читин йигъарра гъафну, Урусат гьарган гъалиб шуйи. Гьамусра коронавирусдиин гъалиб хьидихьа», – гъапну Владимир Путинди.
