10-пи апрелиъ Табасаран райондин Хючна гъулан кючйиригъ гъяйи зирзибил марцц апIуз Хючна гъулан советдин администрацияйин идарйириъ айи гъуллугъчийир, Ягъдигъ ва ЦIурутIил гъуларин культурайин хулариъ лихурайидар уч гъахьнийи. Дурари кючйир, райцентриъ айи парк ва гьацира жара йишвар марцц гъапIну.
Дупну ккундуки, улукьурайи хьадукран ва ислягьвалин машкврар вуйи 1-пи Майдин ва Ватандин Аьхю дявдиъ совет халкьди гъазанмиш гъапIу Гъалибвалин 75-йис хьпан улихь ихь гъулар балгбаъ субботникари уйнамиш апIурайи роль аьхюб ву. Думу машкврариз вари гъулариъ кючйир, гъирагъ-бужагъар къайдайиз хиди кIури, умуд кивдихьа.
Гьаму улихьна йигъари Кюрягъ гъулан жигьилари чпин гъулаъ хъархъас га- тIабхьнайи вари йишварихьан думу уч дапIну, цIа кипну гъубгну. Дурари, вари Дагъустан Республикайиъ айи жигьиларихьна илтIикIну, кIура:
«Миллионариинди гектар жилар гъи лап чиркин гьялнаъ а. Зирзибилин аьхю чIвеэр апIура, дурарик цIийир кирчра. Нирар, гъярариъ айи штар уркъра. Жилиин шулайи бегьер кьит шула. Учуз му ляхнар дигиш апIуз ккундучуз. Учуз ихь ватан гюрчегди рябкъюри ккундучуз, марцци гьавайихь эл хътабгъуз ккундучуз ва му дюн’я ихь гъюзимбу насларихьан марцциди тувуз ккундучуз».
Амма аьламатнан ляхин гьаддиъ аки, гьаз-вуш ихь инсанарин фагьмиъ мар-ццишнан эгьемиятлуваликан вуйи фикрар мюгькамди лигим шуладар. Гъи фунуб – вушра хяр, хутIил, рякъ, кючйир, гъуларин аьтрафар бегьем марцц апIурва, къайдайиз хурва, хъа кьюд-шубуд йигълан гьадушв, аьксина вуди, бешбетерди алабцIнади шулу. Суал арайиз гъюра: шли алабцIура? Шаксузди, гьадму марцц гъапIдари чпи, дурарин баяр-шубари, варис-мирасди, багахьлуйири, дустари, гъуландари, ляхнин юлдшари, аьхирки, ватанагьлийири. Ваъ жара юрдариан, вилаятариан, уьлкйириан дуфну, ихь ругариин чиркишин апIрудар бажагьат ашул. «Марццишин марцц апIру йишваъ ваъ, хъа кадрабцIру йишваъ шули аьдат ву» кIуру аьрифдар гафар инкар апIуз шулдар.
Гьяйифки, уьмуми гьисабниинди ихь уьлкейиъра думу гафар кIваантIан кьабул апIурайи ксар цIибтIан адар. Иллагьки ихь республикайиъ, гьятта ихь райондиъра, думу жигьатнаан аьгьвалат гьич ужувлахъинди дигиш шуладар.
Ваъ, дустар, ухьу чиркинвал дарапIуз дудрубгъкьан гагьди, марццишинра рябкъидархьуз.
