Гьюрматлу ватанагьлийир! Аьхиримжи вазари ихь дюн’яйиъ тарабгънайи коронавирусдин уьзри вари халкьар мюгьтал дапIна. Вари уьлкйириъ айи хабрар гьаддилан ккергъра. Ярхла Китайиъ ачмиш гъабхьи уьзур ихь республикайизра хъубкьур кIури, саринра фикир дайи.
Роспотребнадзорин РД-йиъ айи Управлениейин 16-пи апрелиз вуйи улупбариинди, Дагъустандиъ:
— 154 касдик коронавирус кайивал тяйин дапIна (аьхиримжи йишван ва йигъандин арайиъ 49 кас артухъ гъахьну);
— 6 кас гъийихну;
— 9 кас сагъ гъахьну;
— республикайиъ 8059 касдин анализар ахтармиш дапIна;
— аьзарлуйирихъди аьлакьайиъ хьувализ дилигну, 2142 касдиз хул’ан удучIвувал къадагъа дапIна.
COVID-19 тарабгъувализ аьксивал улупури, ухьу багахьлуйирин ва имбу инсанарин арайиъ аьлакьйир шлубкьан цIиб дапIну, ихь марццишназ ва хусуси сагъ’вал уьбхбаз артухъси фикир тувну ккунду. Учу мартдин вазлин эвелариан мина газатдин гьарсаб нумрайиъ коронавирусдикан бикIури ашра, аьзарлуйирикан туврайи гьаму улупбариз дилигди, ихь арайиъ уьзур тарабгъурайивалихъ хъугъри адру инсанар гизаф а. Дурарин фикриинди, гьюкуматарин кIулиъ айидари ухьуз кучIлин мялуматар тувра. Хъа гьамциб кучIликан шлиз хайир а? Учву фикир апIинай! Ихь гьарсарин багахьлуйирин арайиъ духтирвалин вакилар айихь. Гъи духтрар уьзрихъди гъабхурайи женгнан кIакIнаъ дийигъна. Дурар йишв-йигъ дарпиди лихура. Гьадрарин баркаллу зегьметназ гьюрмат апIурхьа. Гьадрари ухькан ккун апIурайиб тамам апIурхьа. Вахтназди ихь хулариъ гъузурхьа. Багахьлуйир-мирасарихъди вуйи аьлакьйир шлубкьан цIиб апIурхьа. Гьамусяаьт гьарсаб хизандиъ ужуб телефон а. Телефондиан дих дапIну, кIваз рягьят хьайизкьан гафар апIинай. Узузра йиз багахьлуйир рякъюз, дурарихъди улихьнаси дусну гаф-чIал апIуз ккундузуз, вушра, дурарихъди аьлакьйир дерккну, гизаф вахт вуйиз. Телефондиан гафар апIурача, дерди-бала аш, гьубкIрача. Сабур апIувалихъ хъубкьруб гьич фукIара адар. Кьюб гьяфтайиъ ясана саб вазлиъ хулаъ гъузну кIури, ухьу касиб хьидар.
Ухьу, дагъустанлуйир, гележегдиз цIибди вушра пул гъибтру халкьарикан вухьа. Ихь республикайиъ рягьимлувал тарихдиан мина айиб вуйи, читин йигъан гъуншдира кмиди кюмек апIуру.
Коронавирусдин уьзри варитIан гизаф яшлуйириз тясир апIуру дупна. Ухьуз айи улупбариинди, уьзри жигьиларизра инсаф апIурадар. Накь узуз йиз багахьлу духтри, Мягьячгъалайиъ гъагъдиъ айи жигьил дишагьли гьаму уьзриан кечмиш гъахьну гъапиган, кIваз иццру гъапIнийиз. Гъачай, духтрарин тIалабар тамам апIурхьа! Эгер ухьу думу тIалабар тамам апIуйиш, гъи гьаму аьгьвалатнахъна гъидайхьа. Чарасузвал адарди кючйириз муудучIванай. УдучIвруган маска алабхьай. Хулаз гъафибси, элгжар илдитну, хилар бегьемди сябнихьди жикIай, машналан шид алдатай, ушвар-хъюхъяр штухьди марцц апIинай.
Газат урхурайидариз сабсана мялумат туврача. Улихьна йигъари Роспотребнадзорин аьтрафариин али Управлениейи коронавирусдин инфекцияйин тестдин натижйир, анализдин улупбар тасдикь апIбан бадали, Москвайиъ референс-центриз хътауйи.
Гьамус, 2020-пи йисан 14-пи апрелихъан башламиш дапIну, Урусатдин Федерацияйин субъектариъ айи Роспотребнадзорин гигиенайин ва эпидемиологияйин вари центрариъ тяйин гъапIу COVID-19 инфекцияйин натижйир дюздар гьисаб апIуз хъюгъна, ва Москвайин референс-центриъ дурар тяйин апIувал лазим хьибдар.
Учуз айи мялуматариинди, Дагъустан Республикайиъ хьуб лабораторияйи ляхин апIура. Гьаддихъди сабси, гьаму уьзриан аьзарлу духьнайидар анжагъ Республикайин тарагъру уьзрарин центриъ кьабул апIури гъахьнуш, гъи дурар шубубсан больницайиъ (РКБ, РКБ-2, ГКБ-2) ккауз хъюгъна. Гьаддиз сабансан ражари учвкан ихтият хьувал ва духтрарин теклифар тамам апIувал ккун апIураза.
