Вари уьлкейин инсанарик сикинсузвал кипу коронавирусдин уьзрихъди аьлакьалу вуди арайиз дуфнайи аьгьвалатнакан хабар адрур сарун имдар. Фицики, улупнайи вирус себеб вуди, гъи инсанар хайлин ихтиярарихъ, хъа варитIан асасуб — азадди эрг’вал йивуз кючейиз удучIвбахъ мягьрум дапIна.
Урусатдин сагъламвал уьбхбан, гьадму гьисабнаан Дагъустандинра сагъламвал уьбхбан вакиларин улупбариз фикир тувиган, гьяйифки, гьякьикьат йигълан-йигъаз гъизгъин шулайивалинра шагьидар вухьа.
Республикайин аьгьвалатнахь тевиш, гьелелиг Хив райондиъ му уьзриан аьзарлу духьнайир адар. Вушра архаин хьузра мюгьлет тувуб гъалатI ву.
Мялум вуйиганси, уьзур тарабгъбаз аьксиди Хив райондиъра саб жерге серенжемар кьабул апIура.
COVID-19 уьзрихьан райондин жямяаьтлугъ уьрхбан метлебниинди Хив райондиъ саки вари жавабдар гъуллугъарин вакиларин иштирак’валиинди гьяракатнан штаб тешкил дапIна.
Хив райондин главайин заместитель Мирзабег Багъичевди субут апIурайиси, вари Дагъустандиъ гъахурайи гьяракатариз асас вуди, дурарира йишв’ин лазим вуйи уьлчмйир кьабул апIура.
— Коронавирус уьзур гъи вари уьлкейиъ тарабгънайивал фикриз гъадабгъну, дидхьан агьалйир уьрхбан гъайгъушнаъ ади йишвариин лазим вуйи уьлчмйир кьабул апIбаъ аьхю мяна а. Гьадму гьисабнаан райондин аьтрафариин кючйир, асас вуди агьалйир уч шлу йишвар, гьюкмин жюрбежюр идарйир дезинфекция апIбан серенжемар тешкил дапIнача.
Улупнайи вахтназ райондин образованиейин вари идарйир хъяркьна. Урхурайидар кьабул апIайиз улихьна душвариъ дезинфекция гъабхбан метлебниинди 450 кг хлоромин масу гъадабгъуз йикьрар йитIнача.
Райондиз гъирагъдилан гъюрайи хяларин сагъламвал ва вари Урусатдиъ мялум дапIнайи карантиндин къайдйир уьрхювал ахтармиш апIбан жигьатнаан полицияйин ва ЦРБ-йин гъуллугъчйири сикин дарди ляхин гъабхура.
Жиниб дар, гъи яшлуйириз хулариан удучIвувал лапра хатIалу дубхьна. Му аьгьвалатнаъ ЦСОН-дин вакилари чпин гьисабнаъ айи кьабидариз гъуллугъ апIувал хъанара жанлу дапIна.
Къайд апIурза, гъи райондиъ коронавирус уьзриз аьксиди вари мумкинвалар ва кьувватар сарф дапIна,
— гъапну М.Багъичевди.
Хив ОФН-диъ субут гъапIганси, арайиз дуфнайи аьгьвалатнаъ, райондиъ айи мумкинвалариз лигну, ерли кьувватариинди саб жерге серенжемар гъахура. Республикайин терефнаан гьелелиг му жигьатнаан кюмек дубхьнадар.
Дарпиди гъитуз шулдар. Гъи уьлкейин гьякьикьатдин шагьидар шулайиган, ухькан гьарсари, му уьзриз аьксиди удучIвну, ихтиятвал уьбхбаъ аьхю мяна а. Гьюрматлу ватанагьлийир, чарасузвал адарди хулариан муудучIванай! Духтрарин табшуругъар тамам апIинай!
