Дишагьлийирин машкврин улихь узуз аьхиримжи вахтна Дербент шагьриъ гъягъру серенжемариъ жанлуди иштирак шулайи ва ихь халкьдин культура артмиш апIбак лайикьлу пай киврайи шаир, табасаран драмайин театрин директорин заместитель Эльмира Аьшурбеговайиканра пуз ккунди азуз. Дугъан яратмиш апIбарихъди гизафдар таниш ву. Февралин вазлиъ шагьрин мектебариъ кIули гъушу серенжемариъра иштирак шули, дурар гъахуз кюмекра апIури, Эльмира Аьшурялиевнайи ихь багъри театриъ гъабхурайи ляхникан, театриз цIиб вахтналан ужуди ихь чIал аьгъю актёрар лазим шлуваликан кIура. Дидланра савайи, баяр-шубарин, дурарин абйир-бабарин багъри чIалнахьна вуйи маракьлувал артухъ апIури, Урусатдин аьхю шагьрариъ бюджетдин къайдайиинди актёрар гьязур апIру заан образованиейин тешкилатариз баяр-шубар гьауз мумкинвалар шлуб тасдикь апIура.
Улихьнаси Дербент шагьрин 20-пи нумрайин мектебдиъ, табасаран чIалнан дарсар киврайи Балаханум Гьяжиевайин ва Динара Сефербеговайин тешкиллувалиинди, Эльмира Аьшурбеговайин яратмиш апIбариз бахш дапIнайи серенжем кIули гъубшну. Дупну ккундуки, шаирин яратмиш апIбар шагьриъ яшамиш шулайи, табасаран чIал кивру мялимариз ва ихь халкьдин баяр-шубариз ужуди таниш ву. Мектебдиъ урхурайидари серенжемдиъ аьшкьниинди шаирин шиърар гъурхну ва мяълийир гъапIну.
Му мектебдин 8-пи классдиъ урхурайи ихь халкьдин вакил Пейкар Аьбдурягьимова, «Дагъустандин халкьарин культурана аьдатар» кIуру предметдин мялим С.М. Керимовайин ва Ш.Э. Заидовайин теклифниинди, 2018-пи йисан кIули гъубшу «Урусатдин лизи кьарнийир» кIуру проектдихъди аьлакьалу конкурсдиъ иштирак гъахьну. Дугъу Эльмира Аьшурбеговайин чав гъизигу сурат Урусатдин Президентдин грантдиз вуйи конкурсдиз хътапIну ва дидиъ сабпи йишв гъадабгъну. Думу сурат «Халкьарин дуствал – Урусатдин машгьурвал» кIуру китабдик ка.
Мектебдиъ гъубшу серенжемдиъ Пейкран баб Фатмара иштирак гъахьнийи. «Пейкар йиз балин риш вуйиз. Му шуран кьяляхъ, дурарин шубурсана бицIидар а. Пейкру ужуди дарсар урхура. Дугъан ихь чIалнахьна, шиклар зигбахьна, хулан ляхнарихьна маракьлувал а. Пейкраз халачи убхузра дубгъуз ккунди а. Багарихьди халачи рибшуз кказа. Гъит, дубгъри», – кIура Фатма Аьбдурягьимовайи.
Мектебдиъ айи вахтнара багъри чIалназ гизаф фикир туврайи Пейкру ихь чIалниинди шиърарра дикIура, анжагъ дугъу дурар гьеле саризра улупнадар.
Гъит, ихь халкьдигъ зегьмет зигуз ккуни, Дагъустан артмиш апIбак чпин лайикьлу пай киврайи касар артухъ ишри! Эльмира Аьшурялиевна, Зияфет Абудиновна ва Пейкар 8-пи Мартдин машкврихъди тебрик апIури, дурариз дюн`яйиъ айи вари уж`валар ва жандин сагъ`вал ккун апIурхьа!!!
