Гъубшу гьяфтайиъ «Табасарандин нурар» газатдин редакцияйиз гьюрматлу кас Тажудин Рамазанович Мягьрамов гьамциб тIалаб хьади илтIикIну: «Гьюрматлу «Табасарандин нурар» газатдин редакция, гъи йиз терефнаан Табасаран райиондин ЦРБ-йин реанимацияйиъ ляхин апIурайи Сабир Рашидович Аьзизовдиз чухсагъулра, дугъан игитваликан пубра ккун апIури, учвухьинди илтIикIураза.
Узу, яман гьял дубхьну, больницайиз гъахнийзу ва реанимацияйиъ ккаънийзу. Гьадму вахтна Сабир Аьзизовди, чан заан аьгъювалар ишлетмиш дапIну, узу аьжаликкан ккадагъну. Гьамдихъди сабси, ихь гьюрматлу духтир Мирзамягьямед Ханмягьямедовичдиз духтрарин мициб коллектив гьязур апIбаз ва больницайиъ марццивал уьбхбаз аьхю чухсагъул пуз ккундузуз. Мицисдар духтрар лайикьлу йишваз адагъну ккунду. Сабир Аьзизовдин игит ляхникан ихь министерствойизра хабар тувуб ккун апIураза. Инсандин уьмур ярхи апIувал ва дугъан сагъ’вал уьбхювал духтрин хилиъ айивалик умуд кивунза».
Аьдат вуйиганси, жумарт юкIв айи, инсанвал кайи, жарариз кюмекнан хил гьачIабккуз ккуни фунур касра инсанарин арайиъ адлу шулу. Тажудин Мягьрамовдин гафариз аьхю фикир тувну, узу Сабир Аьзизовдихъди ляхин апIурайи духтрарихъди, дугъу гъуллугъ апIурайи аьзарлуйирихъди гюрюшмиш гъахьнийза. Сабир Рашидовичдин гьякьнаан дурарин фикрарин мяна жикъиди гьамци сатIи апIуз шулу: «Ужур, жумарт кас, иццруринра, сагъуринра гъайгъушнаъ айир, гъюдли гаф апIрур, суткайин фуну вахна вушра дих гъапIу йишвахьна гъягърур, чан пишейиин юкIв али, халис инсан ву».
Табасаран райондин ЦРБ-йиъ лихури, Сабир Аьзизовдин гизаф йисар ву. Чакан ва чав регьбервал туврайи аьхю коллективдикан ктибтури, дугъу гьамци гъапнийи:
«Узу мушваъ 1992-пи йисхъан мина реанимацияйиъ анестезиологди ляхин апIураза. Йиз ва ич аьхю коллективдин вазифара – ихь жямяаьтдин сагъламвалин гъуллугънаъ хьувал вуйич. Гьелбетда, аьзарлуйир, сагъламвалин дережа зяиф дубхьнайидар адарди гьеле-меле шулдар. Гьар йигъан учухьна кьялан гьисабниинди 8-10 кас илтIикIуру. Магьа гьаму улихьнаси гъагъи гьялнаъ ади варидариз мялум вуйи кас Тажудин Мягьрамов гъахну, ва йиз агъювалар ишлетмиш дапIну, дугъаз узхьан шулу кюмек гъапIунза. Наркоздихъди аьлакьалу ляхин читинуб вуйиваликан варидариз мялум ву, яв аьгъювалар ишлетмиш дарапIиш, инсан уьмриан гъягъюз мумкин ву».
Сабир Аьзизов 2016-пи йисхъан мина ренимацияйин заведующийди лихура. Гъит дугъаз хъана заан хъуркьувалар ишри ва ухьухь гьамцдар духтрарин кьадар артухъ ибшри. Ич редакцияйин терефнаанра дугъаз чухсагъул кIурача.
