Табасаран эскрар – Ватандин Аьхю дявдин иштиракчйир

 

Гьяжибег Агъабегович Агъабегов

1925-пи йисан Асккан Яракк гъулаъ нежбрин хизандиъ бабкан гъахьну.

 

Багъри гъулан мектебдиъ асас аьгъювалар гъадагъбан кьяляхъ, читинвалар, касибвал себеб духьну, дугъхьан сарун илимдин рякъ давам апIуз гъабхьундар. Думуган жигьил бай марччар-маларихъ гъягъюз мажбур шулу. Дяви ккебгъруган, Гьяжибег Агъабегов багъри гъулаъ ади гъахьну. Сифте думу дявдиз гъухундар. Амма кьяляхъна 1943-пи йисан июндин вазлиъ Ватандиъ гъягъюрайи гьяракатари сикинсузвал кипнайи жигьил чан хушниинди Ватандин намус уьбхюз гъушну.

Дявдин женгариъ Гьяжибег Агъабеговди хайлин игитвалар улупну. Одессайиъ гъахьи гъагъи женгариъ эскрик душмандин гюлле кубкIну, дугъан арччулну хилна лик сакьат гъахьну. Госпиталиъ саб гьял сагъламвал мюгькам дапIну, жигьил бай гъулаз хъадакну гъюру.

Ветерандин кIваин апIбариан: «Дяви ккебгъруган, йиз яш 16 йистIан дайиз. Сифте узуз дина дих гъапIундайи. Уьлкейиъ гъягъюрайи пис гьяракатар йигълан-йигъаз гъизгъин шулайи. Аьлава кюмек лазим вуйи. 1943-пи йисан узура дявдиз гъушнийза. Узухъди Хив райондиан хъана юлдшарра хъайи: Зилдккарин Шихсефер, ГъванцIлан вуйи Аьбдул, гьадму гъул’ан вуйи Сейфудин Беделов.

Учу сифте Батумийиз гъухнийи. Гьадму вахтна душваъ карантин мялум дапIнайи. Кьяляхъна йисари узу КIару гьюлин гъирагъдихъ хъайи: Крымск, Полтава, Одесса ва хайлин жара шагьрариъ гъягъюрайи женгариъ иштирак гъахьунза. Румынияйиъ гъахьи женгар варитIан гъагъидар вуйи.

Дяви ккудубкIбакан шаду хабар Дербент шагьрин больницайиъ айиган гъеебхьнийзуз. Шадвалиан жвуваз кайи аьзиятра кIваълан гьархнийзуз. Ич асас метлеб бегьем гъабхьнийи, аьхир…».

Ватандин Аьхю дявдин иштиракчи ва зегьметнан ветеран Гьяжибег Агъабегов дяви ккудубкIбалан кьяляхъ, «Уьру Хяд» ордендиинди, «Дявдиъ гьунарар улупбаз лигну» Георгий Жуковдин ва йицIубтIан артухъ жюрбежюр жара медалариинди лишанлу гъапIну.
Ветеран 2014-пи йисан ихь арайиан гъушну.