Табасаран эскрар – Ватандин Аьхю дявдин иштиракчйир
Къурбан Мягьямедович Мягьямедов
1919-пи йисан Табасаран райондин Ругуж гъулаъ бабкан гъахьну.
Дяви ккебгъру вахтна, Къурбан Мягьямедовди Белоруссияйиъ гъуллугъ апIурайи. Душваъ думу гъагъи женгариъ иштирак гъахьну. Хъа 1943-1944-пи йисари Мягьямедовди Украинайин шубубпи фронтдин дахилнаъди жюрбежюр женгариъ иштирак’вал гъапIну. Му касдин дявдин рякъ Воронеж, Днепродзержинск ва Одесса шагьрариан тина гъубшну. Ватандин Аьхю дявдиъ Ватан бадали аьхю гьунарар улупбаз лигну, Къурбан Мягьямедов хайлин орденарииндина медалариинди лишанлу дапIна. Думу 2003-пи йисан кечмиш гъахьну.
