Табасаран эскрар – Ватандин Аьхю дявдин иштиракчйир

 

Абукар Мукаилович Мукаилов

1918-пи йисан Хив райондин ГъуштIил гъулаъ нежбрин хизандиъ бабкан гъахьну.

 

1937-пи йисан мектеб ккудубкIу жигьил Баку шагьриъ нафт адабгъру пишекрар гьязур апIру мектебдик урхуз кучIвру. Кьюд йисан думу мектебдиъ дурхну, Абукар Мукаилов Бакуйиъ нафтлин буругъариин лихури гъахьну.

1941-пи йисан Ватандин Аьхю дявдиз чан хушниинди гъушну. Ихь уьлкейиз варитIан читин вуйи 1941-1942-пи йисари Абукар Мукаилов, Украинайиъ 999-пи стрелковый полкнан саб дестейин командир вуди, чан эскрарихъди гъизгъин женгариъ иштирак гъахьну. Гьациб саб женгнаъ гагул хилиз ва кьюбиб ликаризра зийнар духьну, дирбаш эскер госпиталиъ ахъру. Зийнар сагъ гъапIиган, улихьна чав гъуллугъ апIури гъахьи полкназ кьяляхъ гъафну. Нубатнан женгнаъ Абукар Мукаиловдиз гъагъи зийнар шулу, ва думу хъана госпиталиъ ахъру. Духтрари эскер хъана сагъ апIуру, амма дявдиз гьадраъбан гьякьнаан 336-пи приказ адабгъну, 1944-пи йисан думу фронтдиан гъулаз гьаъру.

Абукар Мукаилов дявдин кьяляхъ гъагъи 1946-1954-пи йисари ГъуштIил гъулан Сталиндин ччвурнахъ хъайи колхоздин председателди гъилихнийи. Колхоздиъ ужудар хъуркьувалар айивализ лигну, думу Дагъустандин делегацияйихъди Москвайиз ВДНХ-йиз гьаънийи.

Ватандин Аьхю дявдиъ дирбаш’вал улупбаз лигну, Абукар Мукаилов «1941-1945-пи йисари Ватандин Аьхю дявдиъ Германияйиин гъалибвал гъадабгъбаз лигну», «Ватандин Аьхю дявдин кьюбпи дережайин орден», «Ватандин Аьхю дявдин йисари баркаллу зегьмет зигбаз лигну» ва гьацдар жара орденариинди ва медалариинди лишанлу гъапIнийи.

Гьюрматлу ветеран 83 йисан яшнаъ ади рягьматдиз гъушну.