Гюльнара Мягьямедова
15-пи ноябриъ Мягьячгъалайин «Уйташ» аэропортдин аьтрафариин шид зигбан «Чиркей-МягьячгъалаКаспийск» цIийи ва региондиъ варитIан чIатху магистралин проектдин презентация кIули гъубшну. Проектдин презентацияйиъ Дагъустандин Глава Сергей Меликовра иштирак гъахьну.
РД-йин тикилишчивалин, архитектурайин ва яшайишдинна коммуналин мяишатдин министр Артур Сулеймановди арайиз адабгъу проект 900 агъзуриинакьан инсанар штухъди тямин апIруб ву. Уьбхюрайи йишвхьан Чиркейин шид Каспийск шагьрин гъирагъдиъ айи Балугъарин дагрихьна зигру манзилнан кьадар 80 километр ву.
Министрин гафариинди, гьамусяаьт тикилишчивалин ляхнар гъахурайи йишв’ин техникайин 70 единицайи ва варжтIан артухъ тикилишчйири ляхин апIура. Проектди 176 агъзур кубический метр шид тямин апIиди, думу кьадарну Мягьячгъалайин ва
Каспийскдин агьалйирси, багарихь хьайи гъуларра кади, Избербашра штухъди тямин апIиди.
Шид зигбан ляхнар бюджетдин инфраструктурайин кредитдин дакьатарин гьисабнаан гъахура. 2025-пи йисаз цIийи магистралин шид зигбан ляхнар ккудукIуб планламиш дапIна.
«Ухьу канализацияйин шид марцц апIру дараматарин, хъархъвас тартиб апIру заводарин проектарин презентацйир гъухунхьа. Дурар улихьна йисари жюрбежюр себебариан уьмриз кечирмиш дарапIди гъузу Дагъустандин лап чатху проектар вуйи. Гъи ухьу Кафари Кавказдиъ чIатху проектарикан сабдин презентация гъабхурахьа. Проектди региондин яшайишдинна экономикайин артмиш’вализ манигъвал тувру себебар арайиан адагъиди. Заан ерийин марцци штун тяминвал дарди, гъи ухьхьан Мягьячгъалайинна Каспийскдин сатIи хьуваликан, яшайишдин, промышленный ва ариш-вериш гъабхру объектар артмиш апIбакан улхуз шулдар», – гъапну региондин Глава Сергей Меликовди.
Дугъу гьацира энергетикайин, газ- дихъди, штухъди тямин апIбан ва гьацира рякъяр ккивбан ва рас апIбан месэлйир региондин кIулиъ айирин гюзчиваликк ккайиваликан ва дурар аьхиризкьан чарасуз гьял апIбакан гъапнийи.
«Ухьу гележегдиъра думу месэлйир гьял апIбиин ляхин гъабхидихьа, вари месэлйир гьял дапIну, кIулиз адагъну ккунду. «Чиркей-МягьячгъалаКаспийск» магистралин шид зигбан проектсиб Дагъустандиъ зат гъабхьиб дар», – гъапну региондин кIулиъ айири.
Презентацияйин кьяляхъ Сергей Меликов Буйнакский райондин Чиркей гъулаз гъушну. Дугъу цIиб улихьнаси гъулан жямяаьтдихъди гюрюшмиш хьуз ва дурарин арайиъ айи месэлйир гьял апIуз ерли агьалйириз гаф тувнайи. Сергей Меликов вертолетдиъди
«Чиркей-Мягьячгъала-Каспийск» проектдиинди шид зигурайи йишваз лигузра гъушнийи.
