Аьхиримжи йигъари ихь республикайиъ Федералин центриан – Москвайиан ва Санкт-Петербургдиан командировкайиз дуфнайи духтрари ляхин апIура.
Уьлкейин Президент Владимир Путиндин табшуругъниинди жикъи вахтнан арайиъ оборонайин министерствойин гъуллугъчйири Дагъустандин Буйнакск шагьриъ ва БотIлихдиъ коронавирусдин уьзур кайидар кьабул апIру деврин медицинайин варитIан ужудар айи чюлин госпиталар ккатIарццну, 200 аьзарлу кьабул апIуз 72 духтир авадлугъар ляхнихъ хъюгъна. Гьацира жикъи вахтнан арайиъ Каспийскдиъ, Дербентдиъ ва Хасавюрт райондиъ медицинайин центрар тикмиш апIиди.
Мялуматарин дакьатари туврайи хабрариинди, Дагъустандиъ CОVID-19 уьзур ва сарикан тмунурикна тарабгъру пневмония кайидариз больницйириъ 9 агъзур йишв гьязур дапIна. Гьадму кьадарнан шубуб пайнакан саб пайтIан аьзарлуйири абцIнадар. Аьгьвалат къайдайиз гъюрайиси ву.
Владимир Васильевдин гафариинди, хамис йигъан республикайин гьюкмин кIулиъ айидари коронавирус тарабгънайивалихъди дебккнайи къайда цIиб гъюдал апIбан месэла гьял апIбанди ву. Дидин гьякьнаан республикайин Главайи «Россия-24» телеканалин эфириъ гъапну. Роспотребнадзорин Дагъустандиъ айи управлениейин кIулиъ айири мялумат тувганси, аьзарлуйирин кьадар артухъ хьувал 8 ражарикьан яваш дубхьна.
«Инсанар уьзур тарабгъувал яваш дубхьнайивалин гъавриъ а. Аьгьвалат гюзчиваликкди уьбхюрача», – гъапну Владимир Васильевди. Дугъан гафариинди, гьюкмари региондиъ айи ижми къайдйир пучIу апIбан месэла гьял апIура. Инфекцияйихъди женг гъабхурайи штабдин селекторный совещаниейиз месэла адабгъну, дикъатди гьял дапIну, республикайин бязи районариъ къайда яваш апIбанди ву.
Владимир Васильевди гьацира Дагъустандиъ аьзарлуйирин кьадар ис шулайиваликан гъапну. Дугъан гафариинди, 27-пи майиз вуйи улупбариинди йигъан ва йишван 89 кастIан аьзарлу духьнадар, 456 кас сагъ гъахьну. «Духтрарин ва жара пишекрарин зегьмет гьавайиди гъюдубчIвурадар. Сад йишвандин ва йигъандин арайиъ 2612 тест ахтармиш дапIна, цIиб улихьнаси дициб ляхин аьламатси гьебгърайхьуз, лап багарихьди думу улупбар 3000-риина удучIвиди», – гъапну республикайин Главайи.
Майин 28-пи йигъан Дагъустандиз «УК Роснано» АО-йин правлениейин председатель Анатолий Чубайс кIулиъ ади му компанияйин делегация гъафну. Думу делегацияйихъди региондин глава Владимир Владимир Васильев гюрюшмиш гъахьну. Делегацияйи Дагъустандин духтрариз коронавирусдин инфекция ахтармиш апIру 20 агъзур тестар ва духтрар инфекцияйихьан уьрхру палтар гъахну. Тестарин сабпи партия гъадагъуз «Роснано» АО-йин гъуллугъчйири 10 миллион манат уч гъапIну.
Компанияйи Дагъустандиз 50 агъзуриинакьан тестар хътаъбанди ву.
Майин 28-пи йигъаз вуйи аьхиримжи улупбариинди Дагъустандиъ, вари аьзарлу гъахьидар 4579 кас ву, 4402 кас – сагъ гъахьидар, 151 кас – гъийихдар, 56498 – ахтармиш дапIнайидар, 4103 кас – карантиндиъ хулаъ айидар а. Аьхиримжи йигъан ва йишван 124 кас аьзарлу гъахьну, 241 кас сагъ, 21 кас кечмиш гъахьну.
