Гьаму йисан гьюкуматдин Саб вуйи имтигьян (ЕГЭ) 3-пи июлилан ккебгъра. Думу имтигьян ихь республикайиъ 11 агъзурна 35 выпускникди тувди. Дурар региондиъ имтигьян тувбан бадали лазим вуйи вари шартIарихъди тямин дапIнайивалин гьякьнаан 9-пи июнди Дагъустан Республикайин Глава Владимир Васильевдихъди вуйи Оперативный штабдин заседаниейиъ РД-йин образованиейинна илимдин министр Уммупазиль Уьмаровайи мялум гъапIну.

«ЕГЭ гъабхру йишварин хатIасузвал тямин апIбан ляхнар гьаму гъябгъюрайи вазлин 25-пи йигъаз тамам дапIну ккудукIиди. Хъасин душварин гьязурлугвал ахтармиш апIуз хъюгъди»,

– гъапну министри.

«Мялум дапIну ккундуки, гьарсаб муниципалитетдин главайи, ЕГЭ гъабхру пунктариъ лазим вуйи къайдайиинди вари месэлйир гьял апIбахъди сабси, республикайиъ абхънайи тIягъвниз аькси вуйи серенжемарра духну ккунду: имтигьян тувру пунктар жандин температура аьгъю апIру алатарихъди, уьзрихьан жвув уьрхру жюрбежюр шей’арихъди, лазим вуйи кьадар шид айи путулкйирихъди ва дезинфекция апIру шей’арихъди тямин дапIну ккунду», – аьлава гъапIну министри.

Гьюкуматдиъ айи аьгьвалатназ лигну, цци асас вуди ЕГЭ туврайидар анжагъ заан образование гъадабгъбан бадали урхуз кучIврайи выпускникартIан дар. Хъа июлин вазлиъ жюрбежюр себебариан имтигьян тувуз дархьи выпускникариз августдин 3-пи, 5-пи, 7-пи ва 8-пи йигъари ЕГЭ тувуз аьлава мумкинвал хьибди.