Аьдатар уьрхюрайидар
Зубайдат Шябанова
Сентябрин 13-15-пи йигъари Мягьячгъала шагьриъ Родопский бульвариъ, «Аьдатар уьрхюрайидар» ччвур алди, вари халкьарин художествойин сяняаьткарваларин фестиваль кIули гъубшну.
Фестивалин тешкилатчйир Дагъустан Республикайин туризмдин ва халкьдин художествойин сяняаьткарваларин туризмдин министерство вуйи.
Фестивалиъ Урусатдин жюрбежюр регионариан ва багахь хьайи харижи уьлкйириан 100-тIан артухъ халкьдин сяняаьткарваларин устадар, дизайнерар, зарграр ва яратмишарин коллективар иштирак гъахьну.
Серенжемарин программайиъди, концертарилан гъайри, кюгьне сяняаьткарваларин ярмарка-выставка ачмиш гъапIнийи, деловой сессйир гъухнийи, заргарвалин ва сахсийин искусствйирин устаханйир, пягьливнарин мектеб, интерактивный жадан абццнийи ва жара межлисар гъухнийи.
Мушваъ дагъустандин гьарсаб халкьди чан сяняаьткарвалин майднар ккатIарццнийи. Магьа табасаран халачйирин майдандиин бицIи дуркьаригъ кьюр дишагьлийи халачи рибшура. Дурарин улихь, жара шурхьан бицIи халачйирин ва хили гъурху атIнарин кьимат гьерхри, туристар дийигъна. Табасаран майдандин гъвалахъ къубачйирин авадлугъар, цIиб тинаси балхарин сахсйирин гъабар, унцIукIулин гакIвликан ктау алатар адагъна.
Дугъриданна, арсран алатари, гъидкьикан гъидирху шей’ар, тазади дуржнайи меълишнари, Родопский бульвар му йигъари завун кIанакк ккайи ачухъ музейдиз илтIибкIна.
Фестивализ асас башкъавал иштиракчйири чпи туврайи. Фунурихьна учу сяняаьткарваларикан гьерхри илтIикIишра, дурари аьхю аьшкьниинди чпин абйирихьан гъафи пишейикан ктибтуйи.
Гьаму выставкайиъ варитIан асасуб агьалйир вуйи. Узу швнур-сарихъди сюгьбат гъапIунза.
УнцIукIулиан вуйи гакIвлин уста Мягьямадди гьамци гъапнийи: «Узу гьаму выставкайиъ пулихъди иштирак шулайир дарза. Асас вуди узуз ихь хилиъ багьалу телефонар айи баяр-шубариз гьякьикьи дагъустандин культура ва ата-бабйирин сяняаьткарвалар дяркъну ккундузуз. Узу ктаурайи алатар дурари чпин хилиъ гъидисган, дурарин уларин нур гъябкъган, сяняаьткарвалар ва аьдатар чIивиди гъузрувалин гъаври шулаза. Ухьу аьдатар уьрхюрайи насил вухьа, ва думу дебккуз ихтияр адархьуз».
Асият Мягьячгъала шагьриъ яшамиш шулайир ву. Фестивализ думу чан хизандихъди дуфнайи.
«Узу гьаму фестивализ йиз ришра хъади гъафунза. Дугъаз гьаму успагьи ва багьалу сяняаьткарвалар чан улариинди дяркъну ккундийзуз. Учу гьамушваъ гвар ва шубуб ягълухъ масу гъадагъунча. Нубатнан китайдин уюнжагъартIан му шей’ар лап багалу вузуз. Мушваъ гьациб умун гьава аки, гафариинди пуз шуладарзухьан. Хиял апIин, вари Дагъустан чан успагьивал улупуз саб йишв’ина уч дубхьна. Баркаллагь, тешкилатчйириз». – гъапнийи Асиятди.
Артем Москвайиан дуфнайи турист ву. Дугъу выставкайиз учв хабарсузди адахъуваликан гъапну.
«Узу Европайин хайлин уьлкйириъ гъахьунза. Дюзди кIурза: узу мюгьтал духьназу. Саб йишваъра узуз мици успагьи алатар гъяркъюндарзуз. Мурар сувенирар дар, искусствойин варитIан заан яратмишар ву. Хъа хялар кьабул апIувал жаради къайд апIурза. Баркаллагь, Дагъустан!» – гъапнийи Артемди.
Фестивализ узура йиз шурахъди ва худларихъди гъушнийза. Адам ва Малика дагъустанлуйирин успагьи сяняаьткарвалариин гьяйран духьнайи.
Аьдатар уьрхрудар имидикьан гагьди ихь кюгьне аьдатаризра гележег гъубзди. Хъа думу гележег хъана успагьиб шлуваликан бицIидарин улариан гъюрайи гьяйранвалин нурари шагьидвал апIура.