Нариза ТIаибова
Йишвариин яшайиш жигьатнаан жямяаьтлугъдин игьтияжарна тIалабар тамам апIбан рякъюъ УСЗН-дин вакилари мяналу ляхин гъабхура.
Ич арайиъ гъабхьи сюгьбатнаъ Хив райондин яшайиш жигьатнаан агьалйир уьрхбан управлениейин директор Рафидин Юсуфовди къайд апIурайиганси, ккудубшу йисан дурарихьна, кюмек тIалаб апIури, уьмуми гьисабариинди 1598 кас илтIикIна.
– Гьисабнаъ айидарилан савайи, гьюкуматдин терефнаан жюрбежюр месэлйириан кюмек ккун апIури учухьна тазади илтIикIу ватандашарикан гъапиш, дурарикан 103 кас хусуси метлеб айи дявдин операцияйин эскрарин вакилар ву. Дурариз варидариз ЖКУ-йин гьякьнаан ЕДВ тяйин гъапIну. Дидланна савайи, шубуб хизандиз хулаз табиаьтдин газ зигбан гьякьнаанра лазим кюмекар дапIнача.
Мялум вуйиганси, аьхиримжи йисари яшайишдин йикьрарин бинайиинди гьюкуматдин терефнаан кюмек тувуб кьувватнаъ ипна. Му рякъ’ан сач Хив райондиъ 43 хизандиз тялукь кюмек жара дапIна. Мурарикан 4 кас СВО-йин вакилар ву.
2022-пи йисан 21-пи сентябрилан башламиш дапIну, Урусатдин Яракьлу кьувватарин дахилнаъди контрактдин бинайиинди гъуллугъназ гъушу 64 ватандашдихьна гьюкуматдин дережайиъди улупнайи пулин кюмекар рукьбан ляхинра тамамвалиинди кIули дубхнача.
Ихь гьюкуматдиъ гьамусяаьтна бицIидар айи хизанарин яшайиш за апIбан жигьатнаан натижалу ляхин гъабхура. Хив райондиъ анжагъ саб ккудубшу йисан шубур ва артухъ бицIидар тербияламиш шулайи 320 хизандиз тялукь удостоверенйир тувна.
Агьалйирин яшайишдин шартIар за апIбан метлебниинди Хив райондин тялукь гъатариз гьюкуматдин терефнаан улупнайи муддатнаъ жара гъапIу дакьатарикан кьатI’иди гъапиш, Хив УСЗН-дин гьисабнаъ айи 3140 касдиз 54805492 манатдин кюмек тяйин дапIнача, – аьлава гъапIну Р. Юсуфовди.
Дугъриданна, гъи гьюкуматдин терефнаан агьалйирин яшайиш за апIбан метлебниинди натижалу уьлчмйир кьабул апIура. Гьадму гьисабнаан социальный конрактдин бинайиинди гъулариъ хайлин ватандашари, ЛПХ ачмиш дапIну, мал-къара уьбхювал кьувватнаъ ипна. Гъи, мисалназ улупиш, Хив райондиъ малин йиккун кьимат 700 манатдихьна, чарвайин йиккун кьимат 650-рилан 800 манатдихьна удубчIвнайиган, зиихъ улупнайи саягъниинди чпин хусуси ляхин ачмиш дапIнайи вакилариз харжиди ву пуб дюз шулайин?! ИкибаштIан, гъулан мяишатдин зегьмет думукьан рягьтиб дар, амма, гьадму саб вахтна гьюкуматдин терефнаан тялукь мумкинвалар айиган, гъулариъ ляхин адар пубра дюз гъюрадар…
