Гюльнара Мягьямедова
Мягьячгъалайиъ Дагъустан Республикайин кIулиъ айи Сергей Меликовдин регьберваликкди Республикайин призывдин комиссияйин заседание гъабхьну. Серенжемдиъ гьюкмин органарин кIулиъ айидар, муниципалитетарин главйир, военкомар ва жигьил баяриз армияйиз дих апIру пунктарин вакилар иштирак гъахьну.
Заседаниейиъ удучIвну гъулху Сергей Меликовди 2026-пи йисан гъурулушдиъ арайиз дуфнайи, ярхи йисди призывдин ляхин давам шулайивалин дигиш’валариина фикир жалб гъапIнийи. Региондин главайи жавабдар касарикан эскервалин гъуллугънан гьякьнаан къанундин къайда заан ерийиинди тамам апIуб тIалаб гъапIнийи.
Дагъустан Республикайин военный комиссар Аьбдурягьман Мурадхановди, призывдин кампания фици гъябгъюраш, ктибтнийи. Дугъу къайд гъапIганси, региондин агьалйириз мялуматар тувбан ляхин пландиз асас вуди гъябгъюра: повесткйир электронный форматдиз илтIикIури, эскервалин гьисабнаъ айи Сиягьнан хусуси кабинетариз хътаура. Республикайин вари муниципалитетариъ сифтейин гьисабназ гъадагъбан комиссйири улупнайи пландиинди ляхин апIура. Оборонайин министерствойин урхбан заведенйириз кандидатар гъядягъбан ужуб ляхин Каспийск шагьриъ ва гьацира Гуниб, Бабаюрт районариъ гъябгъюра.
Сергей Меликовди муниципалитетарин главйириз ва военкоматариз призывникариз хабар дебккбан ва дурар яшамиш шулайи йишв аьгъю апIбан ляхин гьяракатнаъ ипуб табшурмиш гъапIну. РД-йин главайи гьацира жигьилариз военный гъуллугънан льготйирикан ва гъуллугъ гъабхбан хусусиваларикан ктибтбан ляхниина региондиъ ерлемиш духьнайи военный частарин вакилар жалб апIбан важиблуваликан гъапнийи.
Заседаниейиъ уч духьнайидар Мягьячгъала шагьриъ контрактдин бинайиинди гъуллугъназ гъадагъбан пунктнан цIийи руководитель лейтенант Андрей Барабашдихъди таниш гъапIнийи. Мидиз улихьна думу Мелитополь шагьриъ гьациб пунктнан начальникдин заместителди лихури гъахьну.
