Зубайдат Шябанова
Гьаму йигъари Табасаран райондин администрацияйиъ 2026-пи йисандин гьюкюматдин аттестацияйин натижйир гъивну.

Совещаниейиъ му месэлайиан доклад хьади Табасаран райондин образованиейин Управлениейин начальник Аьбдусалам Гьясанов удучIвну.
Дугъан мялуматариинди, цци райондиъ 371 выпускникди ЕГЭ тувну. Улихьна йисари мектебар ккудукIу 11 касди чпин имтигьнарин натижйир за апIуб метлеб ади, нубатнан ражари имтигьнариъ иштирак гъахьну. ОГЭ 846 ученикди тувну. Дурарикан 62 ученик имтигьян сабансана тувуз мажбур гъахьну.

 
Урхбан 2025-2026-пи йисандин ЕГЭ-йин ва ОГЭ-йин натижйир йивури, Аь. Гьясановди урхурайидарин гьарсаб предметдиан вуйи аьгъюваларин анализ гъапIну. Дугъан гафариинди, райондиъ урус чIалнаан вуйи аьгъювалар 94,5%, математикайиан 96% ву. Кьюр выпускникди ЕГЭ-йиан 90 ва артухъ баллар гъадагъну. Дурар райондин гимназияйиъ урхури гъахьи Селимат Мирзамягьямадова ва Дарвагъ гъулан 2-пи нумрайин мектебдин ученица Лейсан Исмяилова вуйи.

 
ЕГЭ 80-рилан 90 баллиина 17 ученикдихьан тувуз гъабхьну. Гъубшу йисан дурарин кьадар 7 учениктIан дайи.
2026-пи йисан райондиъ 67 ученик «Аьгъювалариъ тафавутлу хъуркьувалар гъадагъбаз лигну» медализ лайикьлу гъахьну. Дурарикан 28 ученикдиз 1-пи дережайин ва 39-риз 2-пи дережайин медалар тувну.
Цци 14 выпускникдихьан аттестатар гъадагъуз гъабхьундар.
Табасаран райондин глава Мягьямед Къурбановди ГИА-йин натижйирин гьякьнаан чан фикрар ва тIалабар ачухъ апIури, имтигьнариъ варитIан асккан натижйир улупу мектебариъ аьгъювалар тувбан цирклиъ ахтармишар ва анализ дубхну ккуниваликан гъапну.

«Мектебариъ урхурайидарин аьгъюваларин дережайин ва хъуркьуваларин гьякьнаан жавабдарвал мектебарин директорари дубхну ккунду. 11 йисан мектебдиъ урхури гъахьи 14 кас аттестат адарди гъузувалин, чарасуз тувну ккуни варитIан асскан баллкьан гъадабгъуз дархьивалин гьякьнаан думу мектебарин директорари жаваб тувну ккунду. Дурар гъуллугънаъ гъитбан мяна адар», - гъапну райондин главайи.