Умгьанат Сулейманова
Цци мартдин аьхирариъ – апрелин эвелариъ гъургъу мархьари республикайин агьалйириз кьадарсуз зарар тувнийи. Аьхю заваликк Дербент райондин Мамедгъала поселокдин агьалйирра ккахьнийи. КIежюх банд гъургъу аьхю мархьариан гьутIубччвну, шид кьувватлу аьхю нирси, чан рякъюъ алахьурайи машинар, хулар, токран бурузар ва симар улихь гьирчну, дюзенариина гъажабгънийи. Думуган 5 кас гъийихнийи ва 260 яшамиш шлу хулар шту ккаънийи. Саб суткайиъ гъубгъу мархьли инсанари швнуд йисан гъизигу зегьмет вари барбатI гъапIнийи.


Гьелбетда, думу вахтна гьюкмин вакилари му кьазайикк ккахъу инсанариз фикир тутруври имдайи. Дишла комиссия тешкил дапIну, Мамедгъала поселокдин гъирагъдихъ зарар гъабхьидариз хулар дивуз 10 гектар йишв жара гъапIнийи. Дюз гъапиш, думу жилин документар апIури вазна гьацI гъубшнийи. Гьятта хъял гъафидарра гъахьну, кьан апIура кIури, гьаз гъапиш хайлин хизанар жвуван мирасарихь, гостиницйириъ дуламиш шулайи.
Табиаьтдин завалин сабпи къурхулувал, рукьан рякълан улдучIвну, гагул терефнаъ айи Канделаки ва Заречный кючйирин 40-50 хулариз гъабхьну, душваъ сарун яшамиш шлуб гьял имдайи. Магьа гъи диврайи хуларин ляхнар кIули гъахурайи Гьяйбула Давудовди чпи гъапи вахтназ ляхин ккудубкIну. Дугъахъди узу гюрюшмиш гъахьунза, ва касди чпи гъапIу ляхникан гьамциб мялумат тувну.
– Хулар дивайиз сифте кIулиъ, думу йишварин документар гьязур гъапIну ва архитекторари хулар дивбан план тартиб гъапIну.

 Гьелбетда, му ляхнар апIайиз вахт гъябгъюру. Хулар дивуз 5 июнди хъюгъюнча. Кьабул дапIнайи пландиинди 52 хал дивунча, дурарикан 43 хал 125 квадрат ва 9 хал 185 квадрат ади тикмиш гъапIунча. Гьарсаб хизандиз 10 сотых йишвра жара дапIна. Дупну ккундуки, 185 квадрат айи хулар абйир-бабар, баяр-швушвар саб гьяятдиъ яшамиш шулайидариз дивунча. Хъа имбудариз – 125 квадратдин.

 
Му ражари Дербент райондин глава Эльман Аллагьвердиевдикан йиз ва му хатIалу дюшюшар кIул’ина гъафи касаринра кьадар дарубкьан ужуб фикир дубхьнайич. Сифте йигъари Эльман Аллагьвердиев, йигъ гъидипури, таза хулар диврайи йишвахьна гъюйи. Му кас улихьна вуйи гьякимарси дарди, чан халкьдин гъайгъу кайи кас ву. Гьацира РД-йин Правительствойин председатель Мягьямад Рамазанов гьар вазли гъюри, тикилишчивалин ляхнарин зиин гюзчивал апIури гъахьну. Чухсагъул мушваъ ляхин гъапIу тикилишчйириз – дурари, чпиз хулар диврайиси, кIваантIан ляхин гъубхну. Варидариз саб мертебайин хулар дивунча.


Августдин аьхириз вари ляхнар ккудукIуз кIури фикриъ айич, амма акварин ва газарин бицIи месэлйир гьял апIуз хъуркьундайи. Гьамус сарун вари гьязурди ву. Багарихьди Дагъустандин главайин вазифйир вахтназ вуди тамам апIурайи Федор Щукинди хуларин ачрар Мамедгъалайин агьалйирин хилиз тувиди», – ктибтнийи Гьяйбула Давудовди.