Гюльнара Мягьямедова
Дагъустандин урхбан заведенйирин 1000-лан зиина студентари банкариъ айи чпин картйир ва картйирин реквизитар масу тувну. Республикайин къанун уьбхру органари гъуху ахтармишарин натижайиъ 12 уголовный дело гъитIибккну.

КIваина хурача, думу жюре къайдасузваларихъан гъабхру жавабдарвалин гьякьнаан вуйи къанунариъ 2025-пи йисан дигиш’валар тIаънийи. Гьамус, картайин эйси къанунсуз ляхнаригъ гъючIвну адашра, чан карта лутивалин ляхнариз ишлетмиш апIбахъан, карта масу тувбахъан уголовный жаза гъабхуру. МВД-йин Дагъустан Республикайиъ айи идарайи къайд апIурайиси, думу тахсиркарвал жямяаьтлугъдин арайиъ яркьуди тарабгъна. Жигьилариз кми-кмиди «пчIу» пул гъазанмиш апIуз тямягь шулу, амма дурар къанунсуз рякъяриинди пулин дакьатар арайиз хували — чпин карта жарадари ишлетмиш апIували — чпи тахсиркарвалин ляхнин иштиракчйир шулайивалин гъавриъ адар.

Къанунсуз ляхнариз аьксивал улупури, министерствойи профилактикайин ляхин гъабхура: жигьиларин центрариъ лекцийир, квестар социальный сетариъ гъаврикк ккаъбан ляхин тешкил апIура, . МВД-йин гъуллугъчйири рягьятди ва ухди гъадагъу гъазанжарин зарарнакан ктибтура. Гьаддихъди сабси лутивалин ляхнарин иштиракчйири пенсионерариз ва аьхю яшнан агьалйириз кучIал апIбан цIийи схемйир гьязур апIурайиваликан, дицисдар кучIларихъ хъугъну даккниваликан мялуматар тувра.