Феруза Рамалданова
Гъийин девриъ ухьуз гьам илимдин, гьамсана спортдин рякъюъ ужудар хъуркьувалар гъазанмиш апIурайи жигьилар хайлин ахьуз. Дурарикан гьарсари багъри мектеб, гъул ва республика баркаллувалиинди артмиш апIбак чпин пай кивра. Тялукь насларин арайиъ Хиварин кьялан мектебдиъ урхурайи Гюльназ Вурдихановайи лайикьлу йишв бисура.
Гюльназ Вурдиханова 2013-пи йисан 27-пи мартди бабкан гъахьну. Шуран дадайи ва мялимари субут апIурайиганси, думу бицIидихъанмина бажаранлур, яратмиш апIбиин юкIв алир ву.
– Гюльназ фунуб вахтнара кюмекназ хил гьачIабккуз гьялакур ву. Туву табшуругъар бегьемвалиинди тамам апIури, мектебдиъси, хулаъра думу чан чйирин гъайгъушнаъ айир вуйиз.
Шиклар зигбахьна, яратмиш апIбахьна дугъу бицIиди имидитIан маракьлувал улупуйи. Искусствойихьна вуйи аьшкьна аьгъювалар учуз ич аьхю аба Мердан Гьяйдаровдихьан гъафидар ву. Абара чан вахтна бажаранлу художник вуйи. Дугъан наслин ирс Гюльназдиъ текрар шула. Гележегдиъра му рякъ давам апIуз ккун гъабхьиш, узу йиз шураз даягъ хьуз гьязур вуза, – кIура шуран дада Регина Мердановайи.
Дупну ккунду, бажаранлу шуру мектебдин уьмрикра лайикьлу пай кивра.
– Гюльназ чан гъарашугъарин арайиъ искусствойин аьламдиъ тафавутлу шула. Ич классдихьан вуйи цалик керхру газетариз саки вари машкврарин йигъарин улихь мектебдин руководствойин терефнаан заан кьимат туври шулу. Хъа думу шиклар гьарган вари классдин ччвурнахъ Гюльназди гьязур апIура. Дидланна савайи, улихьнаси Гюльназди гъизигу шиклиз республикайин дережайиъди гъубху «Вари яв хилариъ а» серенжемдиъ ужуб кьимат тувну. Думу приздин йишваз лайикь духьна.
Шиклар зигбахьна вуйи маракьлувалихъди сабси дугъу аьгъювалар гъадагъбаъра ужуб ери улупура. 6-пи класс Гюльназди кьюб «4»-тIан адарди хьубариз ккудубкIна. Думу фунуб вахтнара чан дустарин гъайгъушнаъ айир ву, – кIура ич сюгьбатнаъ Гюльназ урхурайи классдин руководитель Гивира Жяфаровайи.
Жигьиларин хъуркьувалиин ухьу гьарсаб вахтна рази вухьа. Гъит му шураз гележегдиъра заан хъуркьувалар гъадагъбан рякъюъ анжагъ рягьимлу ва баркаллу инсанар яракар ишри!
