Гюлягьмад Маллялиев

Дагъустан Республикайин Правительствойин Хабаровский крайдиъ айи вакил Бейдулагь Исаев «Миротворец» Варидюн’яйин рягьимлувалин альянсдин «Мясляаьтчи» кIуру гъизилин ордендиз лайикьлу гъахьну. Дугъаз му награда Урусатдин халкьарин арайиъ ислягьвал ва албагнайивал мюгькам апIбак киврайи пайназ лигну тувуб ву.

 

Гьаму хусуси метлеб айи пешкеш рягьимлувалин ва ислягьвалин ляхнар тешкил апIбаъ, инсанарин фагьмиъ ислягьвалин фикрар мюгькам апIбаъ ватандаш активистари, жямяаьтлугъ касари, политикари, спортсменари, бизнесменари, культурайин ва илмин гъуллугъчйири гъазанмиш дапIнайи хъуркьувалариз жямяаьтлугъдин ва гьюкмин терефнаан тувнайи кьиматнак гьисаб ву. Гьар йисан думу дюн’яйиъ анжагъ 60 инсандизтIан туврадар.

Урусатдин халкьарин ассамблея-йин культурайин комитетдин вакил, шаир Тельман Ражабовдин гафариинди, 2023-пи йисан орден тувбаан экспертный комиссияйин вари вакилари Бейдулагь Исаевдин тереф гъибиснийи.
«Бейдулагь Муслимович аьламатнан инсан ву. Дугъан хил кайи фунуб мяракара, хайир-шейирра гьам Хабаровскдиъ, гьамсана Луганскдиъ, гьам Москвайиъ, гьам ихь республикайиъ заан дережайиъди кIули гъябгъюру. Ва думу мициб ордендин сагьиб хьуз лап лайикьлурра ву», – гъапнийи Тельман Ражабовди. Ва Бейдулагь Исаевдин пенжкик гъизилин орден кибтIнийи.

Къайд апIуз ккундучузки, гьелелиг му орден дагъустанлуйирин арайиъ анжагъ республикайин улихьдин глава Рамазан Аьбдулатиповдиз ва РД-йин Правительствойин Севастополь шагьриъ айи вакил Мурад СалигьовдизтIан тувнадар.
Газатдин редакцияйин терефнаан ихь ватанагьли му заан хъуркьувалихъди кIваантIан тебрик апIурача.