Гюльнара Мягьямедова
Машинарихъ бензин хъубзру 739 станция айи, амма нафт тартиб апIру сабкьан завод адру Дагъустандиъ бензин ккудубкIнайиси ву. АЗС-арин эйсйири вахтназ улихьна пул тувну ашра, нафт тартиб апIру заводари убгруб хътапIурадар. Натижайиъ 1 литр бензиндин кьимат 100-120 манатдиина удучIвна. Заправкйирихъ сарихьна 20 литртIан артухъ бензин ва 50 литртIан артухъ дизелин убгруб туврадар. Республикайин гьюкмар Урусатдин энергетикайин министерствойихьна аьгьвалат дюз апIуб ккун апIури илтIикIну.
Вахтназди Дагъустан Респу-бликайин главайин вазифйир тамам апIурайи Федор Щукинди республика бензиндихъди тямин апIбан гьякьнаан гьамци гъапну: «Сабпиб, рынокдиъ бензиндин кьитвал дубхьна. Бензиндин месэла, Дагъустан Республикайиъси, вари уьлкейиъра гьамциб ву. Кьитвал хабарсузди арайиз гъафну, гьаддиз узу республикайин правительствойиз региондин рынокдиз жара йишвариан аьлава бензин хувалин месэлйир гьял апIуб табшурмиш дапIназа. Ихь регион аьхюб ву, инсанар, ляхнизси, багъри гъуларизра хусуси транспортдиъди гъягъюз мажбур шула. Учу федеральный правительствойихьна илтIикIунча, гьамусяаьт республикайин правительствойин председатель Москвайиъ а. Дагъустандин гьякьнаан улхбар гъахура, ужудар натижйирик умуд киврахьа.
Кьюбпиб, бензиндин кьитвализ дилигну, дидин кьиматарра за гъахьну. Кьит гъабхьиган, фуну сурсатдинра кьимат за шулу. Думу ихь республикайиъси, вари уьлкейиъра гьаци ву. Амма къанунди улупнайи къайдйир дюрхну ккунду, федеральный антимонопольный гъуллугънан терефнан гьюкуматдин гюзчивал а. Думу ляхинра гъабхура.
Шубубпиб. Мягьячгъалайизна Каспийскдиз кайиб ву. Гьаму цIиб улихьнаси инсанарин уьмриз ва сагъламвализ зарар туврайи гизаф АЗС-ар суддин къарарниинди хъяркьнийи. Думу станцйириъ кьюрд ктабхъайиз прокуратурайи ахтармишар гъухнийи. Республикайин кIулиъ айидар гъирагъдиъ дийигънадар. Аьгьвалатнан гьякьнаан анализ дубхна, къайдасузвалар терг гъапIу заправкйир багарихьди ляхник кирчди. Инсанарин уьмур ва табиаьтдин марццивал экономикайин месэлйиртIан багьа ву. Бензиндин кьитвалин, за духьнайи кьиматарин, хъяркьнайи заправкйирин вари месэлйир гюзчиваликк ккайич, лазим вуйи табшуругъар тувнача. Гъавриъ ача, лихурача, натижа ужуб хьибди», – гъапну Федор Щукинди.
Гьюрматлу ватангьлийир! Ре-спубликайиъ арайиз дуфнайи аьгьвалатнан гъавриъ хьуб, лазим дарди хусуси машинариъди мина-тина гъягъювал цIиб апIуб ккун апIурача. ЦIиб вахтналан месэла гьял шул кIури, умуд кивурхьа.
