Зубайдат Шябанова
Зарема Гьямзаевайихъди узу хабарсузди таниш гъахьунза. Социальный сетариан сабдиъ улихьнаси Москва шагьриъ табасаран дишагьлийирин мажлис гъабхьиваликан мялумат гъябкънийзуз. Урусатдин меркездин успагьи залиъ дурари анжагъ табасаран чIалниинди гъабхурайи мажлисдин игитар фужар вуш, ахтармиш апIуз хъюгънийза.
Мицисдар серенжемар Москва шагьриъ яшамиш шулайи ихь ватанагьли Зарема Гьямзаевайин жягьтлувалиинди гъахурайидар ву. Дугъу «Дагъустан дишагьлийихьна хяларди» проектдин дахилнаъди гьар кьюб гьяфтайик варидариз чахьна хяларди теклиф апIура.
Зарема Гьямзаева Табасаран райондин ТIивак гъулаъ бабкан гъахьну. Дугъан адаш саб вахтна чан хал-хизанра хъади Калмыкияйиз Красный Маныч кIуру гъулаз кюч гъахьнийи.
«Калмыкияйиъ ич эм яшамиш шулайи. Адашдиз дугъу гьадина зоотехникди лихуз теклиф апIуру. Гьаммишан Табасарандиъ халачи убхури вердиш гъахьи дадайи, сабпи нубатнаъди гъахру шей’арихъди халачийин дуркьарра гъахнийи. Ватандихьан ярхла ашра, дадайи халачи гъядарди зат гъитдайи. Ватандиз хьаднутIан гъюри шулдайча. Гъулаъ ич таяр шубарихъди сар-сарихъди рякъюз улар хъади шуйча. Амма душваъра вари халачйирихъ шуйи. Думу вахтари шубариз халачи убхуз ккундайи. Хъа, ккундаршра, дурариз чпиз хизандиъ улупнайи гьар йигъандин план тамам дарапIуз чара адайи. Гьадму къайда варидари табасаран хизанарин аьдатси уьбхюрайи.
Улихьган халачи йигъ-йишв убхури гъахьи шубар гъи чпин кеспнахъ тамарзу духьна. Учу ич гюрюшариъ гьаммишан гьаддикан улхури шулча. Улихьнаси Дагъустандиъ бицIи дуркьар масу гъадагъунза. Вахт ккабхъубси гьадму дуркьаригъ узуз тувнайи заказариан бицIи халачйир урхураза», – ктибтура Заремайи.
Калмыкияйиан хъадакну, Дагъус-тандиз дуфну, Гьямзаеварин 20 йискьан ву. Мектеб ккудубкIбалан кьяляхъ, Зарема, ДГУ-йин филологияйин факультетдик урхуз кучIвру. Пише гъадабгъну, думу Дербент шагьриъ 17-пи нумрайин мектебдиъ мялимдира, мектебдин вожатыйдира лихури гъахьну. 2002-пи йисан Республикайин вожатйирин конкурсдиъ 2-пи йишв гъадабгъган, Заремайиз Дербентдин ДДЮТ-диз методистди лихуз дих гъапIнийи. Душваъ ляхниъ дугъан хъуркьувалариз лигну, Заремайиз Дербентдин администрацияйиз ляхниз теклиф гъапIнийи. Амма шуру теклиф кьабул гъапIундар, фицики дугъу гележегдиз жара рякъ кадабгънайи. 2004-пи йисан Зарема Москвайиз яшамиш хьуз гъафну ва гьадму йисан жигьиларин жямяаьтлугъ тешкилатдиъ лихуз хъюгъну.
Заремайин чан хусуси ляхнихьна вуйи рафтар ва жигьиларихъдина живанарихъди гъабхурайи ляхнихьна вуйи янашмиш’вал варидариз рябкъюрайи. БицIи вахтналан думу Москвайин округарикан сабдиъ жигьиларин тешкилатдин руководителди тяйин апIуру. Зарема Гьямзаева Москвайин администрацияйин ва хайлин тешкилатарин терефнаан гьюрматнан грамотйириинди ва дипломариинди лишанлу дапIна. Гьамусяаьт Москва шагьрин рягьимлувалин «Ислягьвал варидариз» (Мир для всех) центриъ психологди лихура.
«Улихьди узу лихури гъахьи центр «Строгино Плюс» кIуруб вуйи. Узу душваъ жигьиларин тешкилатдиз регьбервал тувбахъди сабси, гъагъи хасият хъайи бицIидарихъди ва живанарихъди лихуз хъюгъюнза. БицIидарихъди лихурайи фунур вушра педагог психологдик гьисаб ву. Му ляхин кьабул вуди, узу психологияйиан хайлин курсарин программйир гъудургъунза. Хъасин, ич центр хъябкьбалан кьяляхъ, уьру дипломдиз вуз ккудубкIну, психологдин пишекарвал гъадабгъунза ва уьмрин гъагъи аьгьвалатнаъ ахънайи ва маиф бицIидар айи хизанариз кюмек тувру рягьимлувалин «Ислягьвал варидариз» центриъ ляхниъ дийигъунза.
Душваъ аьхюдарин дестйирихъди ляхин гъабхури 6 йис вуйиз. Дадйир узухьна чпиз Аллагьди гьаз майиф бицIир тувнуш, думу бицIирихъди уьмурлуг фици яшамиш шулуш ва жара суалар хьади илтIикIури шулу. Узу дурарихъди сюгьбатар гъахураза», – давам апIура Заремайи.
Чан асас ляхнилан ва халачи убхбалан гъайри, ихь шуру «Дагъустан дишагьлийихьна хяларди» кIуру проектра гъабхура.
«Хусуси метлеб айи дявдин операция ккебгъиган, яраб узу фтин кюмек апIидикIан кIури, гъахьунза. Мобилизация мялум гъапIу вахтна, хайлиндарик гучI кабхънийи. Гьадмуган инсанариз узухьна хяларди теклиф апIуз ният гъафнийиз. Йиз ва таниш инсанарин статусариъ, социалин сетариъ йиз адрес улупури, «Хялариз хябяхъдиз теклиф» кIуру мажлисар гъахуз хъюгъюнза. Гъюру хяларин арайиъ Урусатдин жюрбежюр халкьарин вакилар ади шулу. Дурариз дагъустандин хинкIар, цIикбар ва жара хурагар гьязур апIури шулза. Саб ражари хяларди 16 кас гъафнийи. Дурарикан узуз анжагъ 4 кастIан танишди дайзуз. Думуган учу мяълийир, ялхъвнар апIури, варибдикан сюгьбатар гъахури шулча. Гъалабулугъвал ва саб фтикан вуш хажалатнан фикрар кайи дишагьлийирин юкIв мицисдар серенжемариъ яваш-явашди ачухъ шулу. Шли-вуш хинкIар апIуз, тмунури цIикбар уржуз гъудубгъну. Мидланра гъайри, бязиган узу кIулди табасаранарин мажлис гъабхурза. Думу серенжемариъ анжагъ бабан чIал апIурча», – аьлава гъапIнийи ич сюгьбатнаъ Заремайи.
Улихьди Табасарандиъ хизанари жвуми йишван садакьа тувру аьдат айи. Думу аьдат хайлиндари гъира уьбхюра. Заремайира хялариз теклиф жвуми йишван апIури шулу. Гъит дугъан садакьа Аллагьди кьабул апIри.
Зарема Гьямзаевайиз сар риш ва сар бай а. Риш чан хал-хизандихъди Санкт-Петербург шагьриъ яшамиш шула, хъа бали мектебдиъ урхура.
Улихьнаси Зарема чан халачийин бицIи дуркьарра хьади Москва шагьрин Уьру майдандиина гъушну. БицIи халачи жиликк ккипну, дид’ин дуркьар дивну, гугар китIуз хъюгъган, думу инсанари ва туристари кьялаъ тIаънийи. Дугъан чав тартиб апIурайи цIийи проектдиз Уьру майдандиин видеоролик гьязур апIуз ният айи. Инсанар уч духьнайи йишвахьна полицияйин десте гъафи. Дестейиъ кьюр ришра айи. Дурари му фу вуш ва гьаз дубхнайиб вуш суалар тувнийи. Заремайи уч духьнайидариз табасаран халкьдикан ва ихь кюгьне сяняаьткарваларикан ктибтну. Дестейиъ айи полицияйин вакил шубари халачайик гугар китIуз гъудубгъну. Душвахь Заремайи швнуб-саб сяаьтна мастер-класс гъабхури гъахьну. Хайлиндари думу йигъан, ихь халачийик разиди гугар китIри, шиклар гъивнийи.
