Зубайдат Шябанова

Гьаму йигъари Табасаран райондин администрацияйиъ райондин главайин заместитель Ренат Мирзабалаевдин регьберваликкди мектебдиз улихьна вуйи образованиейин идарйирин кIулиъ айидарихъди совещание гъабхьну.

 

Совещаниейиъ гьял гъапIу асас месэлйирин арайиъ мектебдиз улихьна вуйи идарйириъ бицIидариз бабан чIалнаан аьгъювалар тувбахъди аьлакьалу месэлара айи.

БицIидарин багъариъ бабан чIал кивбан месэлайин гьякьнаан райондин образованиейин управлениейин кIулин пишекар Айниса Маллялиева удучIвну гъулхну. Дугъу къайд гъапIганси, райондин бицIидарин багъариъ Мягьямед Къурбановдин табшуругъниинди бабан чIалар кивуз хъюгъна.
«Райондиъ айи 37 бицIидарин багъариз 1778 бицIир гъюра. Дурариз варидариз тербиячйири бабан чIалнаан аьгъювалар тувра. Дарсар кивбан цирклиан дорожный картйир ва образованиейин программйир тартиб дапIна. Тербиячйири чпин ляхниъ бицIидар бабан чIалниин маракьлу шлу сюгьбатар гъахура, тамашайин къайдайиинди дарсар гъахури, бабан чIалнан гафарин запас артухъ хьуз гъитра», – гъапну Айниса Маллялиевайи.
Дупну ккунудки, Табасаран райондин бицIидарин багъарин кIулиъ айидариз бицIидари бабан чIалар ва милли культурайиан аьгъювалар гъадагъбан цIиркил мюгькамди ккабалгуз табшурмиш дапIна. Мектебдиз улихьна гьязурлугвал гъабхру идарйириъ аьгъювалар тувбаъ кюмек шлу цIийи алатар, бабан чIал дубгъбаан методикайин рекомендацйир тартиб апIура ва ляхник кипра, деврин дидактикайин материал, литература, алатар масу гъадагъура, бицIидар айи хулариъ бабан чIалнан мурччв гьязур апIура, бабан чIалар кивру тербиячйир пишекарвалин дережа за апIру курсариз гьаъра.
«Улихьнаси учу гъурху ахтармишари тасдикь гъапIганси, хайлин бицIидарин багъариъ бабан чIалар кивбан ляхин мюгькамди ккабалгна», — гъапну Айниса Маллялиевайи.