Гюльнара Мягьямедова
Мектебариъ урхурайидарин абйир-бабарихъди собранйир гъахуб ихь образованиейин гъурулушдиъ айи аьдат ву. Дурар гъахбан метлеб аьгъювалар ва тербия тувбан ляхин тешкил апIбаъ мектебдинна хизандин арайиъ аьлакьа уьбхюб, мектебдиъ айи къайдйирикан ва тIалабарикан абйир-бабариз мялуматар тувуб ву. Классдин руководители чахь урхурайидарин абйир-бабарихъди йисандин арайиъ 4-5 собрание гъахури шлу. Мидлан савайи, директорин тешкиллувалииндира мектебдиъ урхурайидарин абйир-бабарин собранйир гъахуру.
Мектебдиси, ухьу гьарсари ихь веледдиз билиг ва тербия тувбахъан жавабдарвал гъабхурахьа. Мектебдин собранйириъ ихь веледдин хъуркьуваларикан, классдиъ чан таярихъди, мялимарихъди айи аьлакьйирикан мялуматар гъадагъурхьа, гьаддиз дурариъ чарасуз иштирак духьну ккунду.
«Йиз бицIидариз фициб тербия тувну ккундуш, узуз ужуди аьгъязуз», «Хъана пул уч апIиди», «Узуз дурарин ихтилатарихъ хъпехъуз мажал адарзуз» – гьамцдар фикрар апIура гизаф абйир-бабари. Гьаддиз, гизафдар мектебдин собранйириз гъюрадар. Гьаму ражарира, республикайин мектебариъ урхурайидарин абйир-бабарихъди сатIи вуйи собраниейиъ иштирак гъахьнуш гьерхри, узу швнур-сар касдихьна илтIикIунза, амма собраниейиъ дурар фужкIара иштирак гъахьундайи.
Магьа, 22-пи мартди Мя-гьячгъалайиъ онлайн къайдайиинди «ХатIасуз тятIилар» кIул тувнайи вари республикайин мектебариъ урхурайидарин абйир-бабарин сабвуйи собрание кIули гъубшну.
Собраниейиъ МВД-йин УГИБДД-йин кIулин инспекторин заместитель Акиф Исмаиловди рякъяриъ транспортдин хатIайихьан бицIидар уьрхбакан, МВД-йин РД-йиъ айи наркотикарихъди алвер апIбиин гюзчивал гъабхурайи управлениейин профилактикайин отделин кIулиъ айи Надежда Сейфудиновнайи бицIидариз сагъу уьмур хъапIувалин, наркотикарихьан ярхлади гъузбан важиблувалин гъаврикк ккаъбан ляхин гъабхбакан ктибтнийи.
МВД-йин РД-йиъ айи экстремизмдиз аьксивал улупбан центрин оперуполномоченный Сабина Сункулиевайи набалугъ баяр-шубар митингариъ, къайдасузвалариъ ва террориствалинна экстремиствалин тереф уьбхюрайи гьяракатариъ иштирак хьувалихьан ярхла апIбан важиблуваликан гъапнийи. «Ихь бицIидар лазим дару гьяракатарихьан хатIасуз интернетди уьрхюру. Кми-кмиди къанунсуз гьяракатари бицIидар социальный сетарианмина чпихьна жалб апIуру. Гьаддиз набалугъ баяр-шубариин гюзчивал гъабхуб, дурарихъди хатIасуз интернетдин къайдйирикан сюгьбатар гъахуб лазим ву», – гъапнийи дугъу.
Аьхиримжи вахтна набалугъ бицIидариз Интернетдиан чIуру табшуругъар тувру дюшюшар артухъ духьна. Гьюрматлу абйир-бабар, эгер ичв веледдин телефондиъ гьацдар теклифар, табшуругъар айиб аьгъю гъабхьиш, дишлади полицияйин 102 номериз зенг дапIну, мялумат тувай. Ичв бицIириз социальный сетариъ шаклу табшуругъариз, теклифариз жаваб тутрувуз улупай. Террориствалин тешкилатари жигьиларин фикир бегьем дубхьну адру кIулар ккитIикIуру. ТятIиларин вахтна, бицIидар мектебдиъ дарсариъ адруган, дурар хъана гизаф Интернетдиъ жюрбежюр тамшйир апIури дусру. Гьаддиз гьар йигъандин гюзчивал чарасуз ву.
Собраниейиъ РД-йин образованиейин ва илимдин сарпи заместитель Аида Далгатовайи бицIир фунуб вушра къайдасузвалихьан, хатIайихьан уьрхбаъ хизанди ва хизандиъ айи аьдатари важиблу роль уйнамиш апIурайиваликан гъапнийи. «БицIириз тербия тувбаъ хизандин иштираквал аьхюб дубхьну ккунду. БицIидарихъди сюгьбатар гъахуб, дурарихъди гьаммишан аьлакьайиъ ади хьуб, бицIири аьхюдарин терефнаан чаз хъайивал апIурайиб, учв ккунивал гьисс апIуб сабпи йишв’ин дийибгъна. Думуган бицIири гъирагъдиан чакан апIурайи чIуру тIалабариз фикир тувидар», – гъапнийи министрин заместители.
