Зубайдат Шябанова
Гьаму йигъари Табасаран райондиъ Хючна гъулаъ КЦСОН-дин идарайиъ «БицIир мектебдиз гьязур апIин» кIуру акция кIули гъубшну.

Серенжем Табасаран райондин КЦСОН-дин идарайин ва «Марцци юкIв» кIуру рягьимлувалин фонддин Дербентдин филиалин вакилари тешкил гъапIуб вуйи.
Акцияйиз хусуси метлеб айи дявдин операцияйиъ кечмиш гъахьи ва гьамусяаьт душваъ ватандин маракьар уьрхюри женгнаъ айи эскрарин, гизаф бицIидар айи ва касиб хизанарин 100 бицIириз теклиф гъапIну. Дурариз мектебдиз алахьру палтарин, канцелярияйин алатарин ва ипIру сурсатарин кюмек тувну.
Ич сюгьбатнаъ Табасаран райондин КЦСОН-дин гъуллугъчи, «Дагъларин гьюрмат. Хизан» ДРОО–йин Табасаран райондиъ айи дишагьлйирин тешкилатдин кIулиъ айи Армине Аьбдуризаевайи къайд гъапIганси, думу бицIидарикан 36-40 кас хусуси метлеб айи дявдин операцияйиъ айи эскрарин веледар, хъа имбудар уьмрин гъагъи аьгьвалатнаъ ахьнайи хизанарин веледар ву. Саки вари абйир-бабар чпиз кюмек туврайивалиин, чпи гьархри адрувалиин гизаф разиди ву. Хъа швнур-сар эскри, чпин бицIидар мектебдиз гьязур дапIну айиваликан кIури, чпиз рубкьру кюмек жара касиб хизанариз тувуб ккун гъапIну.
«Гъийин бицIидар ихь ужуб гележегдин умуд ва хъуркьувал ву. Уьлкейин кIулиъ айидари вари чпин кьувватар ва фикрар ихь веледар ислягьвалиъ ва мюгькамди артмиш шулайи уьлкейиъ яшамиш хьуб'ина жалб апIура. Улубкьурайи урхбан цIийи йисахъди учву тебрик апIураза. Ичв хъуркьувалариинди ва цIийи аьгъювалариинди учу рази апIинай», – гъапну Табасаран райондин главайин заместитель Ринат Мирзабалаевди.
Дугълан гъайри акцияйиъ иштирак шулайи бицIидар ва дурарин бабар Табасаран райондин КЦСОН-дин директор Тимур Аьлиевди, «Дагъларин гьюрмат. Хизан» ДРОО-йин Табасаран райондиъ айи дишагьлйирин тешкилатдин кIулиъ айи Армине Аьбдуризаевайи, райондин депутатарин Собраниейин председателин заместитель Низами Агъаризаевди тебрик гъапIну ва гележегдиъра кюмек апIуз гьязур вуйиваликан гъапну.