Наргиз Гюлечова
Апрелин вазли Московский областдин Чехов шагьриъ боксдиан Урусатдин первенствойин талитар кIули гъушну. Думу талитариъ ихь уьлкейин регионариан 530 живан спортсменар иштирак гъахьнийи. Гьадрарин арайиъ Каспийск шагьриъ яшамиш шулайи Хив райондин Зюрдягъ гъулан агьали Ислам Рамазановра айи. Талитариъ иштирак хьуз Дагъустандин ужударстар живан боксерарикан уч дапIнайи командайигъди душну, 48 кило айи гъагъишнан категорияйиан Ислам Рамазанов Урусатдин чемпион гъахьну.
Му талитариъ иштирак хьайиз, Спортдин заан устадвалин мектебдин (ШВСМ) клубдиъ Мягьямед Ибиевдин хиликкди боксдиан аьгъювалар гъадагъурайи Ислам эвелиан Мягьячгълайин боксерарин арайиъ, хъасин республикайин, гьаддин кьяляхъ СКФО-йин регионарин арайиъ сабпи йишван сагьиб гъахьну. Жара гафариинди, Урусатдин первенствойиъ Ислам Рамазановди гъазанмиш гъапIу заан хъуркьувалин бина мюгькамуб гъабхьну. Хъа первенствойиъ хьуб ражари жара регионариан вуйи спортсменарихъди талитназ удучIву табасаран бали бегеьмди чак кайи гьунарар улупну. Дагъустандин командайи гъазанмиш гъапIу кьюб гъизилин медаликан саб Ислам Рамазановдин ву.
Улихьна йигъари живан спортсмендиз «Табасарандин нурар» газатдин редакцияйиз дих гъапIунча. Исламна дугъан адаш Рамис редакцияйиз хялар гъахьнийи. Ич сюгьбат Исламди учв му спортдиин бицIиди вуйихъанмина машгъул духьнайир вуза кIури, ккебгънийи.
«Эвелиан узу кикбоксдиин машгъул духьнайза. Узура, бицIину чвера сатIиди, Каспийскдиъ му жюрейин спортдиан аьгъювалар туврайи Эсед Эседовдин хиликкди гьязур шулайча. Хъа саб вахтналан анжагъ боксдиин машгъул духьну, гьадму кадабгъну гъузуз кьаст гъапIунза, фицики, му спорт – тамашачйириз лигуз аьшкь шлуб ва хайлин мумкинвалар айиб ву.
Узухъди талитназ адауз шлу спортсменар адрувализ лигну, Каспийскдин спортивный клубдиан удучIвну, Мягьячгъалайиъ ерлешмиш дубхьнайи ШВСМ спортдин клубдиз гъягъюз мажбур гъахьунза. Узухъди дина йиз чвера гъафнийи», – давам гъапIнийи Исламди.
Къайд дапIну ккундуки, Ислам Рамазановди Каспийск шагьрин 13-пи нумрайин мектебди 9-пи класс ккудубкIну, ОГЭ-йин вари имтигьянарра ужудар баллариз тувну. Дугъу мектебдиъ урхубра чан спортдин рякъюхъди тархьну давам апIуз кка. Гьамусяаьт спортсмен гьаму йисан октябрин вазли кIули гъябгъру Европайин чемпионатдихьна гьязур шула. Живан спортсменди чан улихь хъанара жара метлебарра дивна ва дурар кIулиз адагъуз чарйир зигура.
