Зубайдат Шябанова

 
Августдин 11-пи йигъан Каспийск шагьриъ Аьли Аьлиевдин ччвурнахъ хъайи спортдин дараматдиъ вари халкьарин «Мастера ковра» юкьяр дисбан лигайи 15 талит кIули гъухну. Гьарсаб кчIихбаъ иштирак шулайи спортсменар вари чпин гъагънан категорияйиъ вари дюн’яин чемпионар ва машгьур спортсменар вуйи. Дурарин арайиъ Табасаран райондин вакил, машгьур спортсмен Эмирбег Мягьямадбеговра айи. Дугъахъди кчIихуз ОАЭ-йин машгьур спортсмен, вари дюн’яйин чемпион Рафаэль Шейхисламов удучIвну.

 

Эмирбег Мягьямадбегов вари халкьарин спортдин мастер, ветеранарин арайиъ Урусатдин йирхьуб ражари чемпион, греко-римский кчIихбариан Урусатдин Кубокдин сагьиб, юкьяр дисбаан Урусатдин урчIвуб ражари чемпион ва ветеранарин арайиъ вари дюн’яйин чемпион ву.
Цци февралин вазли мачт-реваншдиъ дугъу нубатнан ражари Арменияйиан вуйи вари дюн’яйин чемпион, вари халкьарин спортдин мастер, машгьур спортсмен Егише Нерсисяндиин 7:0 гьисаб ади гъалиб духьну, 100 кило гъагъ айи спортсменарин категорияйин чемпионвалин чIул гъазанмиш гъапIну.
Каспийскдиъ гъахьи талитарихьна думу бегьемди гьязур гъахьнийи. Шубуб гьяфтайин арайиъ Эмирбегди чан гъагъ 12 кило исина ктипну ва 100 кило гъагънан категорияйин ерина, 88 кило гъагъ айи категорияйин спортсменарихъди талитназ удучIвуз гьязурди айивал улупну.

 
Эмирбег Мягьямадбеговдихъан юкIв убгурайи тамашачйир ва гьевескрар талитариз лигуз хайлиндар уч гъахьнийи. Талитариъ ОАЭ-йин спортсмен саб дупну ккагъуз мумкинвалар гъахьнушра, Эмирбегу, тамашачйириз ва гьевескрариз талит хъана артухъди маракьлу шлубси, вахт ярхи апIури гъахьну. ИкибаштIан, дугъу чан гьевескрарин юкIвар багьем рази гъапIну ва дагъустандин кчIихбарин тарихдиз чан ччвур нубатнан ражари гъибикIну.

 
Халачийин устадарин федерацияйин президент Шамиль Аьбдуселимовди Дагъустандин сабпи президент М.Аьлиевдин призариз вуйи варихалкьарин талитариъ гъадабгъу чемпионвалин медалихъди ва гъалибвалин чIулихъди, Урусатдин лайикьлу тренер Эмирбег Мягьямадбегов гьюрматнан грамотайииндира мубарак гъапIну.

 
«Шубуб ваз мидиз улихьна узуз юкьяр дисбаан вари халкьарин «Мастера ковра» лигайин кIулиъ айидари талитариъ иштирак хьуз теклиф дивнийи. Дурари цци феврали гъахьи талитариъ йиз кчIихбар чпиз кьабул гъахьиваликан ва нубатнан ражари аьхю маракьлувалиинди лигуз иштагь айиваликан гъапну. Узу рази гъахьунза. Узухъди кчIихуз дурари спортсмен агуз хъюгъну. Белорусияйиан, Новосибирскдиан, Москвайиан узухъди кчIихуз ккунидар айи. Хъасин Арабский Эмиратариан вуйи спортсмендира талитариъ иштирак хьуз ккунивал улупну. Талитарихьна узу гьязур гъахьунза. Йиз сарпи асас тренер Владимир Сидоровди гъапиганси, талитназ увухъди удучIвру спортсмен зяифур шулдар. «Талитнаъ кчIихбар фици ккудукIуруш, сарихьанра пуз шлуб дар. Увухъди удучIвнайи спортсмендин гьарган гьюрмат ади гъуз ва дугъан мумкинвалариз заан кьимат тув. Гъалиб хьуз ккундуш. Сарпирди спортзализ гъач ва варитIан кьаназ гъуз» – кIуйи йиз тренери. Гьадму насигьятар узу гъира фикриъ уьрхюраза. Йиз практикайи ва узу гъадагъурайи гъалибвалари йиз тренерин гафар тасдикь апIура.

 
Каспийскдиъ талитарин кьяляхъ узуз октябрь вазли Эстонияйиъ гъягъру вари халкьарин талитариъ иштирак хьуз теклиф дивну. Гьамус узу гьадина гьязур шидиза», – гъапну Эмирбег Мягьямадбеговди ич сюгьбатнаъ.

 
«Табасарандин нурар» редакцияйин коллективдин терефнаан Эмирбег Мягьямадбеговдиз гъалибвал мубарак апIури, гележегдиъ хъана заан хъуркьувалар гъадагъури, табасаран ва дагъустан гьевескрар рази апIури гъитуб ккун апIурача.