Зубайдат Шябанова

Гъябгъюрайи йисан Табасаран райондин Хючна гъулаъ Цалак микрарайондин асас кючйирикан сабдиъ цIийи бицIи багъ ибтуз планламиш дапIна.

Табасаран райондин глава Мягьямед Къурбановди къайд гъапIганси, Ражабовдин ччвурнахъ хъайи кючейин багахь ерлешмиш дубхьнайи спортдин майдандин гъвалахъ ибтрайи цIийи багъдиз дакьатар «Шагьрин аьтрафар гъулайвалиинди ккабалгувал» федералин проектдиан жара апIиди. Багъ ибтайиз вуйи гьязурлуг’валин ляхнар ерли бюджетдин дакьатарихъ гъахуру. ЦIийи сквериъ гьарар кивди, аквар китIди, гъвандин шибар ккахьнайи тротуарар ккирчди, беседкйир ва скамейкйир дивди.

БицIи багъ ибтру йишв 470 кв. метртIан артухъ, хъа сквер 1000 кв. метртIан артухъ ву. Цалак Табасаран райондиъ цIийи сквер гъулайди ккабалгнайи сабпи йишв хьибди. Ва дидиз инсанар ухдитIан ккилигура.