Гьюрматлу ватанагьлийир ва газатдин дустар!
Магьа цIийи 2024-пи йис улубкьура. ЦIийи йисан ужудар марцци ниятар, умудар, хиялар юрутмиш апIури, ухьуз цIийи уж’валар-бахтар, хъана заан хъуркьувалар ишри! ЦIийи йисан дюн’яйиъ ислягьвал зияда хьуб, Ватан бадали гъябгъюрайи хусуси метлеб айи дявдин операцияйиъ гъалибвал гъадабгъну, ихь жюрэтлу эскрар сагъ-саламатди жвуван хизанарихьна хъадакну гъюб ккун апIурача.
Ктабхъурайи йисан ич коллективди ихь республикайин, табасаран районарин ва газат урхру юлдшарин уьмрин важиблу месэлйир гъитIирккури, хайирлу теклифар диври, ихь халкьдин вакиларихъди гюрюшмиш шули, хайлин месэлйир гьял апIбак жвуванра пай кивну. Улубкьурайи йисанра газатдин коллективдин ва газат урхру юлдшарин арайиъ ихтибарлу аьлакьйир хъана мюгькам шул пну, умуд киврача.
Гьюрматлу дустар! Улубкьурайи 2024-пи йис учвуз мубарак апIурача! Гъит гьарсар кас чан умударихъ хъуркьри, хизанариъ девлетна берекет артухъ ибшри, хъа багъри Дагъустандин авадан ругариин уьмурлугъ ислягьвалиинди миллетар албагну яшамиш ишри!
Аьхю гьюрматниинди «Табасарандин нурар»
газатдин коллектив
