Зубайдат Шябанова
Табасаран райондиъ хайлин йигъари мархьар ургъбан натижайиъ 16-пи июнди федеральный мяна айи «Кавказ–СиртIич–ТIаттил» рякъюъ 45-пи киллометрин манзилнаъ, ЦIийи Лижва гъулазди гъюру рякъюъ гъяд абхъну. Аьхю бахтнаанси, гьадму вахтна гъяд’ин машинар алди гъахьундар.

 

Табасаран райондин глава Мягьямед Къурбановди арайиз дуфнайи аьгьвалат чан гюзчиваликк уьбхюра. 17-пи июли «Дагъавтодор» ГКУ-йин вакилар Табасаран райондиз гъафну. Дурар муниципалитетдин глава Мягьямед Къурбановдихъди сатIиди ЦIийиЛижва гъулаз гъяд абхъу йишв’ина гъушну.
Гьамусяаьт меркездиан дуфнайи делегацияйи абхъу гъядун аьгьвалат ахтармиш апIура. Чпин ляхнин натижа йивури, дурари гъяд рас апIбан ва арайиз дуфнайи гъагъи аьгьвалат къайдайиз хпан гьякьнаан къарар адабгъиди.

Муниципалитетдин администрацияйин кIулиъ айидари райондин агьалйирикан, гъяд’ин расвалин ляхнар гъахру вахтна гьадму рякъюъди дурушуб ккун апIура. Думу терефназди гъягъюз ккунидарихьан АхьитI–Цухдигъ терефнаан вуйи аьлава рякъюъди гъягъюз шулу. Думу рякъ ЦIийи Лижва ва жара гъулариантина Дербент–Хючна–Хив терефназди гъябгъюрайи республикайин мяна айи ужуб рякъ ву.

Къайд дапIну ккундуки, аьхиримжи вазари республикайиъси Табасаран райондиъра сикин дарди ургъурайи мархьариан жилин гъат лап лам гъабхьну. Рякъярин жюрбежюр йишвариъ жилар кучвурхбан ва ахьбан дюшюшар шула, бязи йишварихьан рякъяр штари гъухну. Гъийин йигъаз Табасаран райондиъ рякъяриъ хатIасуз ва гъагъи гьялназ гъафи 30 йишв гьисабназ гъадагъна. Гьамусяаьт «РСУ» АО-йин «Табасаранский» филиали райондин гъагъи гьялназ дуфнайи жюрбежюр йишвар рас апIура. Амма, сикин дарди ургъурайи мархьари рас ва марцц гъапIу рякъяриина жил цIийи кIул’ан кучвубхури гъюра, мархьлин штари рякъяр гъахура, аьхю ичIар шула. Мархь убгъру вахтна расвалин ляхнар гъахузра гъагъиди ву.
Гьамусяаьт райондиъ рякъ хъадабтIнайи гъул сабра адар. Вари гъулариз жара йишвхьанди илтIикIну гъягъру рякъ а.