Зубайдат Шябанова
РФ-дин Государственный Думайин гюзчивал гъабхру комитетдин председателин заместитель Дмитрий Гусевди мялумат тувганси, Госдумайиз Урусатдин мектебариъ урхурайи баяр-шубариз сад йигъан кьюб ражари пулсузди мани хураг гьивбан гьякьнаан къанундин проект гьял апIуз арайиз адабгъна.
«Урусатдин мектебариъ 18 миллион бицIидари урхура. Дурарикан хайлиндар гъагъи уьзрарин аьзарлуйир ву. Гьаци хьувалин асас себеб, бицIидариз сад йигъан чарасуз лазим вуйи шубуб чIев мани хураг ишлетмиш апIуз мумкинвал даршулайивал ву. Ич къанундин проектдиинди абйир-бабарихьан закурин йигъак миж ва умуд кивуз шулу. Федералин дережайин жягьтлувалиинди Проект тартиб ва кьабул дапIну гьяракатнаъ ипувал вари уьлкейиъ бицIидарин сагъвал тямин апIувалихьна алдабгъурайи мюгькам гам хьибди», – къайд гъапIнийи Дмитрий Гусевди.
Гьамусяаьт мектебариъ йигъан саб ражари сабдиан юкьубпи классариъ урхурайи, гьацира гизаф бицIидар айи ва уьмрин гъагъи аьгьвалатнаъ ахьнайи хизанарин бицIидариз пулсузди мани хураг гьивра. Мектебариъ имбу классарин ученикари мани хураг пулихъди масу гъадабгъура.
