Наргиз Гюлечова
Мартдинна апрелин вазари ургъурайи мархьар-селлер ккудукIну, майдин вазли табиаьтдин гьавйир манишнахъинди дигиш гъахьибси, инсанари чпин хутIлар, багълар ва бистнар хъархъвсарихьан марцц апIури шулу. Гьаддихъди сабси хизанарихъди, ярар-дустарихъди, гъарашугъарихъди уччвудар майднариина вая яркврариз рягьятвал гъадабгъуз гъягъру ва каббар апIру фасилра ккебгъна. Фикир гъапIиган, му ляхнар кIваз хуш вуйи, зарар кадру ляхнар ву, амма натижайиъагьвалат жараб шулу. Рягьятвалихъди сабси, цIа кабхъбахъди аьлакьалу вуйи хатIалуваларра арайиз хьуб мумкин ву. Гьаддиз лап ихтиятди гъузну ккунду, гьарарин, гъеерццу тIулар-кьаларин багарихь цIа кипну ккундар, фицики думу цIа хабарсузди тарабгъуз мумкин ву.
Гьаму йисан 1-пи апрелихъанмина Дагъустан Республикайиъ цIа кабхъбахъди хатIалувал айи фасил ккебгъна. ЦIийир кархьбахъди аьлакьалу хатIалувалар арайиз гъюру фаслин арайиъ, республикайиъ цIа кабхъбаз аькси къайдайи ляхин апIура кIури, региондин МЧС-дин управлениейин пресс-гъуллугънаан хабар тувра.
КIваин дапIну ккундуки, бистнариъ, багълариъ, майднариин, яркврариъ ачухъди цIа алапIруган, къанундиъ улупнайи къайдйир уьрхюри, цIин хатIасузвалихьна хъанара артухъ тIалабар улупна. Эгер думу тIалабар уьрхюри адарш, цIа алапIу кас административ жавабдарвалихьна хуз мумкин ву. Мисал вуди гъадабгъиш, жвуван гьяятдиъ вушра каббар апIруган, алапIурайи цIа хуларихьан саб кьадар манзилнаъ ади ккунду, дарш дицир касдин 15 агъзур манатдин журум апIуз мумкин ву.
Гьаддиз, каббар апIруган вая жараси цIийир алаъруган, улупнайи тIалабар тамам апIури, анжагъ гьязур дапIнайи йишварихьтIан цIа алапIну ккундар.
Мидланра гъайри, гьаму фаслин арайиъ цIин хатIасузвалин къайдйир уьрхюри дархьиш, аьдати касарин 10 агъзурилан 20 агъзур манатдиина, гъуллугъчйирин — 30 агъзурилан 60 агъзуриина, хусуси дилаварчйирин – 60 агъзурилан 80 агъзуриина, юридический касарин 400 агъзурилан 800 агъзур манатдиина журум апIуз ва гьаддихъди сабси дурар уголовный жавабдарвалихьна хуз мумкин ву.
Гьамдихъди аьлакьалу вуди, Дагъустандин МЧС-дин управлениейин вакилари, республикайин агьалйирихьна илтIикIну, цIин хатIасузвалин уьлчмйир дюрхну ккуниваликан кIура. Мидланра гъайри, цIа кабхъуз мумкинвал айи йишварихь гъеерццу укIар-кьалар, зир-зибил дурубгуб ккун апIура ва гьацира рягьятвал гъадабгъуз гъушу йишвариан хулариз кьяляхъ гъягъруган, чпин кьяляхъди гьадму йишв марцц апIуб ва кабхьнайи цIа кутIубшвуб ккун апIура. Фицики, дирчну гъузнайи бутулкйир ригъдин нурари убцру дапIну, цIа кабхъуз мумкин ву.