Гюльнара Мягьямедова

 
18-пи августди РФ-дин Президентдин администрацияйин кIулиъ айирин сарпи заместитель Сергей Кириенкойи ва вахтназди Дагъустандин Главайин вазифйир гъахурайи Федор Щукинди республикайин «Дагъларин жюрэтлувал» («Доблесть гор») программайин выпускникариз дипломар ва чан ччвурнахъан вуйи сяътар тувну.

Проектдин дахилнаъди хусуси метлеб айи дявдин операцияйин 35 ветеранди гьюкуматдин ва муниципальный идара апIбан цирклиъ лазим вуйи аьгъювалар гъадагъну. Прграммайиз асас вуди, проектдин иштиракчйири йисандин арайиъ 502 академический сяаьтна аьгъювалар гъадагъну ккундийи. тажруба айи насигьятчйири, гьюкмин органарин кIулиъ айидари, федеральный экспертари Ветеранарихъди ляхин гъубхнийи. Программайин иштиракчйирин аьгъювалар ва тажруба гьюкуматдин хайлин гъуллугъариъ лазим ву. Дурарикан гизафдар РД-йин Главайин ва Правительствойин администрацияйиъ, Халкьдин Собраниейин аппаратдиъ, хусусиятнан министерствойиъ, табиаьтдин девлетарин министерствойиъ, промышленностдин ва алверин министерствойиъ, зегьметнан ва экономикайин артмиш’валин министерствойиъ, республикайин шагьрарин ва районарин администрацйириъ лихура.
«Гьамцдар читинвалар айи гъийин заманайиъ, хусуси уьмуртIан, уьлкейин маракьар заанди дисуз шлу касар, фуну ляхниъра кIулиъ хьуз, уьлкейин кадрйирин резервдиъ хьуз лайикь ву. Хусуси метлеб айи дявдин операцияйиъ республикайин ва уьлкейин сурат лайикьлуди улупбаз, ичв кьягьялвализ чухсагъул пуз ккундузуз. Гьамушваъ, узу Дагъустандиъ айиган, гъи фронтдиъ дирбаш асланариси женг гъабхурайи дагъустанлуйириз чухсагъул пуз ккундузуз. Думу ляхни, Дагъустандин халкьарикси, вари Урусатдин ватандашарикра дамагъ капIра», – гъапну Сергей Кириенкойи программайин иштиракчйирихьна илтIикIну.

 
Федор Щукинди къайд гъапIганси, Дагъустан федеральный «Игитарин вахт» программайиз ухшар айи «Дагъларин жюрэтлувал» ччвур тувнайи региондин хусуси программа уьмриз кечирмиш апIурайи РФ-дин субъектарикан сабпиб ву. «Учвкан гьарсари, хилиъ яракь ади, Ватандихьна вуйи ккунивал, ватанпервервал улупунчва. Гьамус ичв уьмрин рякъюн цIийи пай ккебгъра: учвуз цIийи аьгъювалар, тажруба ачвуз, учвуз гьюкуматдин, муниципалин гъуллугъариъ ичв аьгъювалар ишлетмиш апIуз мумкинвал тувна. Уькейин хъуркьувалар бадали учву лайикьлуди ляхин апIур кIури, умуд киврача», – гъапнийи республикайин кIулиъ айири.
Программа РД-йин Главайин ва Правительствойин администрацияйи гьюкуматдин идара апIбан РАНХ-дин ва ГС-дин Заан мектебдихъди уьмриз кечирмиш апIурайиб ву.

 
РФ-дин Президентдин админи-страцияйин кIулиъ айирин сарпи заместитель Сергей Кириенко программайин иштиракчйириз сертификатар тувуз Дагъустандиз гъюб – му республикайин проектдиз заан кьимат тувуб ва хусуси метлеб айи дявдин операцияйин ветеранарихьна уьлкейин кIулиъ айидарин терефнаан аьхю гьюрмат улупуб ву. Программайи тяйин апIурайиганси, Ватан уьбхюрайидаринна гьюкмин кIулиъ айидарин арайиъ аьлакьа хъана ижми шула.

Гьамус программайин выпускникарин улихь цIийи месэлйир дийигъна. Дурариз жандин сагъвал ва гьацира уьлке, республика ва ихь ватандашар бадали гъабхру ляхниъ заан хъуркьувалар ккун апIурхьа.