Зубайдат Шябанова
Улихьна йигъари Ивановский областдиъ кIули гъубшу «Урусатдин халкьарин дуствалин хоровод» конкурсдиъ ихь ватанагьли Эсмира Гьяжимягьямедова гъалиб гъахьну.
Эсмира Хив райондин ЦIудухъ гъул’ан ву. 2015-пи йисан Дербент шагьриъ Г.Б. Къазиаьгьмедовдин ччвурнахъ хъайи ДППК ккудубкIну, дугъу гьамусяаьт ДГУ-йин дагъустан филологияйин 4-пи курснаъ урхура. 2015-пи йисан думу чан жилирихъди Ивановский областдин Новолаки шагьриз яшамиш хьуз гъушну. Дурариз кьюр велед а. Эсмира бицIидарин багъдиъ тербиячиди лихури I0 йис ва ментальный арифметикайин тренер духьну шубуд йис ву.
«Урусатдин халкьарин дуствалин хоровод» конкурс бицIидарин багъариъ лихурайидарин арайиъ гъабхура. Цци думу конкурсдиъ 162 кас иштирак гъахьну. Финализ дурарикан анжагъ 7 кастIан удучIвундар. Дурарин арайиъ узура аза», – ктибтура Эсмирайи.
Конкурсдин сабпи этап онлан къайдайиинди гъубшнийи. Кьюбпи этапдиз гъафи экспертари финализ удучIврудар гъядягъну.
«Ич багъдиз гаф туву вахтна узу аьдати тербиячиси сягьнайиина удучIвундайза. Сабпи нубатнаъди Дагъустандин тарих ва варитIан гизаф миллетар мушваъ фици арайиз гъафнуш кюгьне нагъил ктибтури, табасаран дагълу дишагьлийин сурат, ихь халкьдин культура ва аьдатар жюрийин, экспертарин ва жара тамашачйирин улихьна адагъунза.
Уч духьнайидариз табасаран чIалниинди йиз риш Ханумди мяъли гъапIну. Хъасин узу дурариз ихь халкьдин милли палатдикан, хили гъурху машгьур табасаран халачйирикан ва жара сяняаьткарваларикан ктибтунза.
Аьхириъ узу тербияламиш апIурайи бицIидари лезгинка ялхъван апIбиинди ва Кавказдин, хъа асас вуди табасаранарин хяларихьна вуйи гьюрмат улупури, милли хурагар дадмиш апIуз дурарин улихьна адагъбиинди, ич номер ккудубкIунча», – гьевес кади ктибтура Эсмирайи.
Конкурсдин натижйириинди, Эсмира Гьяжимягья-медова финализ удучIвну. Гъалибчйирин ччвурар август вазли гъябгъру мялимарин яркьу конференцияйиъ мялум апIуру. Хъа гьелелиг, ччвурар ашкар дапIнадаршра, багъри культура ватандихьан ярхла айи вакилари уьбхюрайивали, культурайихьна ва халкьдин аьдатарихьна вуйи мани рафтари дурарин устадваликан ва гъалибвал багахь хьайиваликан кIура.
«Урусатдин халкьарин дуствалин хоровод» конкурсдин метлеб мектебдиз улихьна вуйи бицIидар ватанпервервалин гьиссариинди тербияламиш апIури, Урусатдин халкьарикан, дурарин аьдатарикан аьгъювалар тувуб ву. Му конкурс Урусатдин саки вари регионариъ гъабхура.
Му жюрейин серенжемариъ узу саки гьар йисан иштирак шулаза. Дурари пишекарвалин рякъюъ хайлин заан мумкинвалар тувру. Гьадму гьисабнаан цIийи проектар, авторский программйир арайиз хуз, педагогвалин ужудар методикйирихъди, бажаранлу гъарашугъарин тажрубайихъди таниш хьуз ва дуствалин аьлакьйир уьрхюз», – аьлава гъапIнийи Эсмирайи.
Эсмира гъалиб шлувалиин саб шакра адарич. Гъит августдин конференцияйин кьяляхъ дугъаз варидари гъалибвал мубарак апIрубси ва дугъан улихь хъана заан конкурсарин финалариз вуйи рякъяр ачухъ ибшри.
