Гюльнара Мягьямедова

 
Дагъустандиъ Къарабудагъкент райондин Зеленоморск гъулаъ Каспий гьюлин гъирагъдихъ Урусатдиъ варитIан чIатху Вариурусатдин футболин центр тикмиш апIуз хъюгъна. Саб миллиард манат харж гъябгъру дарамат 2027-пи йисан аьхириз ккудубкIиди. Региондин гьюкмарин улупбариинди, думу жюре спортдин дарамат ихь уьлкейиъ адар. Проект уьмриз кечирмиш апIуз хъюгъбакан вахтназди республикайин главайин вазифйир тамам апIурайи Федор Щукинди мялумат тувну.

 Региондин кIулиъ айирин гафариинди, думу центр Дагъустандианси, Урусатдин жара субъектарианра командйир кьабул апIуз шлу, ярхи йисди тренировкйир гъахру базаси албагиди. Гележегдиъ центриз айи мумкинвалари душваъ Урусатдин футболин милли сборный командайин ва гьацира жара командйирин жюрбежюр дережйирин тренировкйир гъахуз хьибди. Гьамци, дарамат ихь уьлкейин футболин артмиш’валин важиблу центрарикан саб, федеральный мяна айи серенжемар гъахру майдан дубхьну ккунду. Проект Урусатдин футболин союзди (РФС) уьмриз кечирмиш апIура. Центрин дахилнаъ футбол уйнамиш апIру аьхю 6 майдан хьиди.

Центр дивбан ляхнар гьяракатнаъ а. Багарихь хьайи аьтрафарра къайдайиз хура. Дагъустан Республикайин терефнаан центрихьна гъюру рякъяр апIиди, спортсменариз, тренерариз ва дина гъюру хялариз транспорт дебккру йишвар ккабалгиди.

 
Футболин центр тикмиш дапIну ккудубкIган, думу шлубкьан яркьуди ишлетмиш апIбанди ву. Пишекарвалин ва жигьиларин командйир гьязур апIбалан савайи, душваъ футболин чIатху талитар, спортдин жара серенжемар гъахуз хьибди. Талитар адру вахтна комплекс Урусатдин футболин клубариз тренировкйир гъахру майдан хьибди. Гьамдиинди центрин вазифйир ккудукIурадар. РФС-ди объект пишекрар гьязур апIру образованиейин майдансира ишлетмиш апIбанди ву. Душваъ тренерар ва судйир гьязур апIиди, футболин цирклин вакиларин пишекарвалин дережа за апIру дарсар кивди.
Республикайиъ гьаму жюре комплекс тикмиш апIуб уьлкейинси, республикайинра спортдин инфраструктурайин артмиш’валин аьхю хъуркьувал ву.