Гюльнара Мягьямедова

25-30-пи октябриъ Мягьячгъалайиъ Расул Гьямзатовдин 100 йисандин юбилейиз бахш дапIнайи Дагъустандин гимнастикайин сабпи фестиваль «DagGym-2023» кIули гъябгъиди.

 

«Фестивалиъ Урусатдин 10-тIан артухъ шагьрариан, гьадму гьисабнаъди Донецкдианра, 400-диинакьан гимнасткйир иштирак хьиди. Талитар художествойин гимнастикайиан, дестейиъди вуйи гимнастикайиан ва бедендин сагъвал бегьем адру бицIидарин гимнастикайиан гъахиди. Фестивалин метлеб Дагъустандиъ гимнастика арт-миш апIуб ву. Думу жюрейин фестивалар гьар йисан гъахбанди вуча», – гъапнийи гъюру вазлин аьхирариъ шлу спортдин серенжемдиз бахш дапIнайи пресс-конференцияйиъ республикайин художествойин гимнастикайин федерацияйин кIулиъ айи Тамара Уружевайи.

«Гьамина дуфнайи учу тербия туврайи гимнаст шубар вари Урусатдин талитарин гъалибчйир ва пешкешнан йишвар гъидисдар ву. Камила Муртузялиева улихьнаси Пятигорскдиъ гъабхьи чемпионатдиъ сабпи йишв гъадабгъну дуфнайир ву. Учу ич улихь гизаф планар диврача, заан хъуркьувалар гъазанмиш апIбак умуд киврача.

Учуз ихь халкьдин терефнаан кюмек лазим вучуз. Художествойин гимнастикайиин машгъул духьнайи шубари гьяфтайиъ 6 йигъан, гьар йигъан 4-6 сяаьтна залиан удудучIвди, зегьмет зигура. Дурар, чпи зигурайи зегьмет фукьан гъагъиб вуш, гъавриъ а, имбударра гьаддин гъавриъ хьувал дурариз важиблу ву. Эгер дакьатарин мумкинвал айи касари ихь республикайиъ му спортдин жюре артмиш апIуз пулин кюмек тувнийиш, ужи шуйи…», – гъапнийи «Гимнастикайин академия» спортдин клубдин тренер Амина Къурбанисмаиловайи.

Фестивалиъ иштирак хьуз ккунидарихьан гьелелиг аьрзйир кьабул апIури ами. Чемпионатдиъ 3 йислан 25 йис’ина яшар вуйидарихьан иштирак хьуз шулу.