Наргиз Гюлечова
Цци Дагъустандиъ мектебар ккудукIурайидарикан гъийин йигъаз 32 касди гьюкуматдин сабвуйи имтигьян (ЕГЭ) варитIан заан – 100 баллиз тувну. Мидин гьякьнаан РД-йин образованиейинна илимдин министерствойин пресс-гъуллугънаан хабар тувра.
Республикайиъ ЕГЭ туву выпускникарикан урус чIалнан имтигьяндиан 100 балл 12 касди, химияйиан 10 касди, профильный математикайиан 5 касди, физикайианна тарихдин дарснаан кью-кьюр касди ва обществознаниейиан 1 касди заан баллар гъазанмиш гъапIну.
Заан баллариз имтигьян туву выпускникарикан Каспийскдин образо-ваниейин центриъ урхурайи Гюльмира Гьялифатовайи республикайин тарихдиъ сабпи ражари урус чIалнаан, физикайиан ва профильный математикайиан вуйи имтигьнар вари 100 баллиз тувну.
Гюльмирайи улупу рекорддин гьякьнаан Дагъустан Республикайин главайин вазифйир вахтназди тамам апIурайи Федор Щукиндира чан фикрар ачухъ гъапIну.
«Дагъустандин бажаранвал кайи бицIидари узу гьяйран апIуразу. Магьа Гюльмирайи улупу гьунарарин натижа ихь тарихдиъ сабпи ражари шулайиб ву. Дугъу шубрид имтигьнарра гьар са-саб 100 бализ тувну ва бажаранвализ сяргьятар адруб варидиз субут гъапIну.
Гьамус риш, чан уьмриз пишекарвалин рякъ кадабгъну, заан образование гъадабгъуз урхуз гъягъиди. Умуд кивраза, Гюльмирайиз айи аьгъюваларина бажаранлували республикайизра хайир тувди.
Гюльмира, уву дугъриданна аькьюллу риш вува. Учу лап кIваантIан ув’инди дамагъ апIурача. Уьмрин цIийи рякъюъ хъуркьувалар ишривуз», – гъапну Федор Щукинди.
Хъа сарсан выпускник, Мя-гьячгъалайин 5-пи нумрайин лицейиъ урхурайи ихь ватанагьли Тамерлан Аьбдуллаевди профильный математикайиан 100 балл, физикайиан 98 балл гъазанмиш гъапIну. Му бай чан аьгъювалариин умудлу ву, ва гьаддиз 98 балл хьуб’ин рази дарди, мидин гьякьнаан чан ляхин ахтармиш апIуз аьрза тувна кIури, дугъан бабу – Сейранат Аьбдуллаевайи, «Табасарандин нурар» газатдиз ктибтну.
Дагъустандиъ ЕГЭ-йиан 100 балл гъадагъу выпускникариз гьюкуматдин терефнаан кюмек вуди, республикайин бюджетдиан 100 агъзур манат пул туври хайлин йисар ву. Ццира думу аьдат давам апIиди ва вари 100 балл гъазанмиш гъапIу выпускникариз 100 агъзур манатдин пешкеш тувди.
Гьюкуматдин сабвуйи имтигьян тувру асас йигъар ккудукIну. Гьмусяаьт резервный йигъар ккергъна. Му йигъари саб фицибкIа багьна удубчIвну ЕГЭ-йиз гъюз вая сабпи ражари имтигьян тувуз дархьидариз сабансан мумкинвал тувра. Гьаддин кьяляхъ вуйи натижйирииндира 100 балл гъабхьи выпускникарин кьадар артухъ хьубра мумкин ву.
