Гюльнара Мягьямедова
РД-йин Правительствойин председатель Аьбдулмуслим Аьбдулмусли-мов Урусатдин Правительствойин председателин заместитель Дмитрий Патрушевдин регьберваликкди ВКС-дин къайдайиинди кIули гъубшу РФ-дин субъектариъ гьясил апIурайи гъулан мяишатдин сурсат жара уьлкйириз масу тувбан месэлйириз бахш дапIнайи совещаниейиъ иштирак гъахьну.
Чан улхбаъ Дмитрий Патрушевди къайд гъапIганси, Урусат гъулан мяишатдин сурсатар харижи уьлкйириз масу тувру мюгькам уьлке вуди гъубзра.
2025-пи йисандин натижйириинди, харижи уьлкйириз 41 миллиард долларинтIан артухъ кьадар сурсатар масу тувну, гьадму гьисабнаан масу туву балугъар ва гьюлин жара сурсатар 22%-дин, йиккунна никкдин сурсатар 20%-дин, кондитервалин меълишнар 14%-дин за гъахьну.
Урусатдин Президент Владимир Путинди 2030-пи йисаз экспортдин кьадар (2021-пи йисандин улупбарихь тевиган, 55 миллиард доллартIан артухъ) 1,5 ражари за апIбан месэла дивну. Дмитрий Патрушевди гъапиганси, улихь дивнайи месэла гьял апIбан бадали, гьюкмин органарин ва бизнесдин кьувватар сатIи дапIну ккунду.
Дагъустанди 2026-пи йисан харижи уьлкйириз гъулан мяишатдин хайлин сурсат масу тувну. «Ухьу экспортдиз хътапIурайи сурсат артухъ апIбиин ляхин гъабхурахьа. Учуз айи улупбариинди, 2026-пи йисандин кьюб вазлин арайиъ ихь региондин карханйири Узбекистандиз чарвайин йикк, Азербайжандиз балугъин йикк, Кыргызстандиз дюгю масу тувну. Варидюн’яйин рынокдиъ Дагъустандин гъулан мяишатдин сурсатназ гизаф муштарйир а», – гъапнийи Аьбдулмуслим Аьбдулмуслимовди Дмитрий Патрушевдихъди вуйи совещание ккудубкIбан кьяляхъ журналистарихъди вуйи сюгьбатнаъ.
Азербайжанди, Белоруссияйи, Грузияйи, Индияйи, Иорданияйи, Иракди, Казахстанди, Киргизистанди, Китайди, Ливанди, ОАЭ-йи, Таджикистанди, Турцияйи ва Узбекистанди ихь республикайихъди алвечивалин ужудар аьлакьйир уьрхюра.
2025-2026-пи йисари «Варихал-кьарин кооперация ва экспорт» милли проектдин «Гъулан мяишатдин цирклин сурсат харижи уьлкйириз масу тувуб» федеральный проект уьмриз кечирмиш апIбаъ Дагъустанра иштирак шула.
