Наргиз Гюлечова

Гьар йисан Дагъустандиъ гьясил апIурайи сурсатар экспортдиз гьаъра. Аьхиримжи 5 йисандин арайиъ жара гьюкуматариз хътаурайи шей’арин, сурсатарин кьадар саки 3 ражари артухъ гъабхьну. Мидин гьякьнаан улихьнаси республикайин Халкьдин Собраниейин депутатарин улихь Дагъустандин Правительствойин председатели йисандин натижйирикан вуйи докладдиъра гъапнийи.

Дагъустандин гъулан мяишатдин сурсатаризси, промышленностдин шей’аризра харижи гьюкуматариан муштарйир а. РД-йин эспортдиз кюмек апIбан центрин кIулиъ айи Руслан Абаскьулиевдин гафариинди «Салаватстекло Каспий» карханайиан вуйи шюшйир Узбекистандиз ва Азербайжандиз, хъа «Дагестан Стекло Тара» карханайиъ гьязур апIурайи банкарна путулкйир Азербайжандиз гьаъра.

Мидланра гъайри, харижи уьлкйириан Дагъустандиз муштарйир агбан ляхин давам апIури, центри ккудубшу йисан республикайиз Алжир ва Беларусь гьюкуматарин вакилар дих гъапIнийи. Гьаддихъси сабси, сач майдин вазли Дагъустандин бизнесдин вакилари, Султанат Омандиз душну, дурарихъди сатIиди ляхин апIбан йикьрар гъийитIну.

«Багарихьди жвуван йимишарикан республикайин консервйирин карханйириъ гьясил апIурайи ширйир Таиланддиз гьауз хъюгъди. Му месэла саки гьял дапIну ккудубкIна. Гъубзнайиб анжагъ сурсатарин сертификация апIувал ву», – аьлава гъапIну Руслан Абаскьулиевди.