Гюльнара Мягьямедова

7-пи мартди Мягьячгъалайиъ Госдумайин депутат Султан Гьямзаев, Дагъустандин журналистарин Союздин 65 йис хьпахъди аьлакьалу вуди, республикайин СМИ-йин вакиларихъди гюрюшмиш гъахьнийи. Юбилейин серенжемдиъ РД-йин мялуматарин ва чап апIбарин агентствойин кIулиъ айи Аьбдуризакь Жамалудинов, Урусатдин журналистарин Союздин Дагъустандин региондин отделениейин председатель Мягьямед Ибрагьимов, милли газатарин, республикайин телевидениейин ва хайлин жара журналистар иштирак гъахьнийи.

 

«Дагъустандин журналистарин Союздин 65 йис тамам хьували региондин журналистикайи ккадапIнайи ужуб рякъ улупура. Хъа ухьуз 65 йистIан артухъ рякъ ккадапIнайи хайлин газатар ахьуз. Дагъустандиъси гьаму кьадар милли чIалариинди журналистика артмиш дубхьнайи йишв наанкIа адар. Ухьу гьадму ляхин, айи аьлакьйир яркьу апIури, хъана кьувватлу дапIну ккунду.
Дагъустандин журналистика ужуди артмиш хьувал ихь улихь дийибгънайи уьмуми месэла ву. Дагъустандин ужудар журналистарин проектарикан, республикайиъси, уьлкейин жара йишвариъра улхури, дурарикан мялуматар ади ккундухьуз», – гъапнийи депутатди.

Султан Гьямзаевдин гафариинди, Дагъустан мялуматарин хатIасузвал уьбхбаъра кмиди Урусатдин кьибла форпост ву. Журналистарин ляхин важиблуб ву. Чпин гьар йигъандин вазифйир тамам апIубтIан гъайри, дурари дюз дару мялуматар даргъури, жигьиларин кIул илтIибкIуз чара абгурайи чIуру гьяракатарихъди женгра гъабхура.
Серенжемдиъ журналистари цирклин гъуллугъчйирин цIибди вуйи маважибарин, таза кадрйир адрувалин, бабан чIалниинди улхрударин ва бикIрударин кьадар цIиб шулайивалин, гьадму шараитари милли газатар урхрударин кьадар цIиб апIрувалин месэлйир гъитIирккнийи. Султан Хамзаевди думу месэлйир гьял апIбаъ кюмек тувуз гаф тувнийи.
Гюрюшдин аьхириъ Султан Гьямзаевди ужударсдар журналистариз гьюрматнан грамотйир тувнийи ва кюкйир багъиш гъапIнийи.