Зубайдат Шябанова

Мартдин 22-пи йигъан Табасаран райондин Хючна гъулаъ Кьалухъ Мирзайин ччвурнахъ хъайи спотдин дараматдиъ 2026-пи йисандин Мектебдин волейболин лигайин муниципальный этап кIули гъубшну.

 

Турнир райондин администрацияйин кюмекниинди 3-пи нумрайин райондин бицIидаринна живанарин спортдин мектебди тешкил гъапIну. Талитариъ райондин мектебариан 12 команда иштирак гъахьну.
Гьарсаб мектебдин командайи чиб саб десте вуйивал гьисс апiурайи уьмуми рюгьну, гъалибвалихьна вуйи гьевесну ва маракьлу тамашйири дурар талитарихьна бегьем гьязур духьнайивал улупурайи.

Талитарин натижйириинди Хючна гъулан 2-пи мектебдин командайи сабпи йишв гъазанмиш гъапIну. Кьюбпи йишв – Халагъ гъулан мектебдин ва шубубпи йишв ЧвулатI гъулан мектебдин командйири гъадабгъну.
Му талитарикан ич сюгьбатнаъ чан фикрар ачухъ апIури, райондин 3-пи нумрайин ДЮСШ-йин директор Садикь Уьсмановди къайд гъапIганси, мектебдин волейбалин лига – му аьдати талитар дар. Думу турнир бицIидар ва мялимар сатIи апIурайи спортдин машквар ву. Турнириъ райондин мектебариъ урхурайи живанар сар-сарин мумкинваларихъди таниш шула, ва йислан-йисаз дурарин арайиъ ужудар хъуркьувалар улупурайи баяр артухъ шула.

Мектебарин волейболин лигайиъ гъалиб гъахьидар ва призерар кубокариинди, грамотйириинди ва жара пешкешариинди лишанлу гъапIнийи. Мидланра гъайри, Хюрикк гъул’ан вуйи меценат Низамудин Аьлиевди сабпи йишв гъазанмиш гъапIу Хючна гъулан 2-пи мектебдин командайиз пулин пешкеш тувну.
Гъалиб гъахьи команда цци апрелин вазли Мягьячгъала шагьриъ кIули гъябгъру Республикайин волейболин лигайин финалиъ иштирак хьибди. Ихь живанарин командайиз гьадушваъра заан хъуркьувалар ккун апIурхьа.