Гюльнара Мягьямедова
Мартдин 10-пи йигъан Мягьячгъалайиъ Дуствалин хулариъ «Саб вуйи Урусат» политический партияйин региондин советдин президиумдин заседание гъабхьну. Серенжем кIули гъубхур Дагъустандин глава, партияйин региондин отделениейин секретарь Сергей Меликов вуйи. Заседаниейиъ ерли отделенйирин секретарар – республикайин шагьрарин ва районарин главйир, вахт ккимиди сесер тувуб тешкил апIру региондин тешкиллувалин комитетдин членар иштирак гъахьнийи.
Заседаниейиз, вари уьлкейинси, республикайинра жямяаьтлугъдинна политикайин важиблу гьядиса – Урусатдин Федерайияйин Федеральный Собраниейин урчIвубпи дихнан Государствойин Думайиз ва Дагъустан Республикайин миржибпи дихнан Халкьдин Собраниейиз депутатар ктагъбан месэла адабгънайи.
Сергей Меликовди къайд гъапIганси, гьаму ражари сесер тувбан кампания, 2021-2026-пи йисаринси дарди, политикайин читин шартIариъди гъябгъиди. Амма, региондин единороссарин кIулиъ айири къайд гъапIганси, Владимир Путиндин къарар дидхьан чIуруди тясир апIуз хьибдар: кьудратлу гьюкумат тикмиш апIуб, уьлкейин маракьар уьрхюб давам шула.
Гьюкум арайиз хувалин цIийиваларикан улхури, Сергей Меликовди кадрйирин программйирикан, экономикайин артмиш’валикан, милли проектар уьмриз кечирмиш апIбакан гъапнийи.
Гьацира республикайин кIулиъ айири «Саб вуйи Урусат» партияйи вахт ккимиди гъабхурайи сесер тувбан (праймериз) ляхниканра ктибтнийи. «Думу ихь партияйин хъуркьувал ву. Къайда тартиб дапIна, инсанарин ухь’ин ихтибар ал. Думу, вахт ккимиди кандидатар гъядягъбан ляхинси, жямяаьтлугъдихъди вуйи сюгьбатра ву», – гъапнийи Сергей Меликовди. Гьаддихъди сабси, дугъу ляхин чарасуз саб лазим вуйи къайдайиинди ва ачухъди дубхну ккуниваликанра гъапнийи.
Региондин главайи чан улхбаъ гьацира вахт ккимиди сесер тувбан иштиракчйириз барабар шартIар арайиз духну ккуниваликанра гъапнийи. Думу ляхин гьамусяаьт лихурайи депутатаризра, цIийиди кандидатурйир улупурайидаризра, жямяаьтлугъ тешкилатарин вакиларизра, волонтераризра кайиб ву.
Сергей Меликовди хусуси метлеб айи дявдин операцияйин иштиракчйиризра асас фикир тувну. «Вахт ккимиди сесер тувбан ляхниз хусуси метлеб айи дявдин операцияйин иштиракчйир жалб апIбан бадали, дурариз яркьу мумкинвалар тувну ккунду. Дурарин уьмрин тажруба, дугъривал, Ватандиз вафалувал ихь партияйиз аьхю хазна ву. Дурарин ччвурар сиягьариъ ади хьували партия мюгькам апIиди», – гъапну республикайин главайи.
Кандидатар улупбан ляхин 11-пи мартдиан 30-пи апрелизкьан давам хьибди. Вахт ккимиди электронный сесер тувбан ляхин 25-пи майдихъан 31-пи майдизкьан давам хьибди.
Сергей Меликовди президиумдин членарикан ва ерли отделенйирин секретарарикан ляхин хусуси гюзчиваликкна гъадабгъуб, ляхин партияйин Уставдиз тялукь вуди гъабхуб тIалаб гъапIну.
Региондин главайи къайд гъапIганси, гьаму йисан электронный сесер тувбан ачухъ жюре ишлетмиш апIиди: 18 йис ва думутIан артухъ йисар тамам духьнайи, Госуслугйириъ гьисабнаъ айи фуну сечкичийихьан вушра чан сес тувуз хьибди. Вахт ккимиди сесер тувбан ляхин PG.ER.RU сайтдиъ гъябгъиди.
Заседаниейин дахилнаъди президиумдин членари вахт ккимиди сесер тувбан тешкиллувалин комитетдин ляхин РД-йин Халкьдин Собраниейин гьамусяаьт ляхин апIурайи Госдумайиз сечкйир гъахбан региондин тешкиллувалин комитетдиз табшурмиш гъапIну.
Комитетдин дахилназ, хусуси метлеб айи дявдин операцияйин иштиракчйирра, жямяаьтлугъдин вакиларра кади, 15 кас гъадагъну.
Тешкиллувалин комитетди Лениндин ччвурнахъ хъайи майдандиин ерлемиш дубхьнайи Профсоюзарин хулаъ, 106-пи кабинетдиъ, итнийиан жвуми йигъаз гвачIнин сяаьт 10-дихъан хябяхъдин сяаьт 5-дизкьан, султ ва элгьет йигъари гвачIниндин сяаьт 10-диан лисхъан сяаьт 2-дизкьан ляхин апIура. Исполкомдин гъуллугъчйири гьацира кандидатариз лазим вуйи кюмек апIиди.
