14 апрели Дербент шагьриъ Кьибла Дагъустандин мектебарин 11-пи классариъ заан кьиматариз урхурайи баяр-шубарин слет хьибди. Серенжем «Кьибла Дагъустандин жигьиларин союз» ДРОО-йи меценат, жямяаьтлугъ кас ва политик Мамед Абасовдин пулин дакьатарихъ кIули гъабхиди. Слет гъабхурайи вахтна урхбаъ тафавутлу гъахьи баяр-шубар кьиматлу пешкешарихъди ва пулин премйирихъди лишанлу апIиди.

Тешкилатчйирин гафариинди, слетдиъ Кьибла Дагъустандин 10 райондин – Агъул, Ахцигь, Дербент, Докъузпара, Къурагь, Мягьярамкент, Рутул, СтIал-Сулейман, Табасаран ва Хив – ва 2 шагьрин – Дербент ва Дагъустандин Огни– мектебариъ урхурайи выпускникар иштирак хьиди.
Дупну ккундуки, му слет Мамед Абасовдин кюмекниинди «Кьибла Дагъустандин жигьиларин союзди гъабхурайи 4-пи серенжем ву. Дидин асас метлеб бажаранвал кайи жигьилариз чпин мумкинвалар ашкар ва артмиш апIуз кюмек тувуб ву.

Слетдиъ иштирак хьуз ккунидари чпин анкетйир райондин/шагьрин образованиейин управлениейиз, хъа управлениейи 28-пи март хьайиз уч духьнайи анкетйир mol.yuzhdag@mail.ru почтайиз хъадаъну ккунду. Слетдин тешкиллувалин комитетди гьарсаб райондиан слетдиз 5 кас гъядягъиди.

Хъайи-хъайибси слетдин гьякьнаан мялуматарихъди «Кьибла Дагъустандин жигьиларин союз» ДРОО-йин социалин сетариъ таниш хьуз шулу:
1 https://vk.com/mol.yuzhdag
2 https://t.me/s/mol_yuzhdag