Шарафудин Дашдемиров
Ассаламу алейкум, гьюрматлу чвйир ва чйир! Магьа ихь улра хъимиди гирами Рамазандин ваз яваш-явашди аьхирихъна гъюра. Ухьуз Лайлат уль-кьадрин йишв кьисмат ибшри, ихь дисурайи ушвар, апIурайи гъудгнар, дюъйир, туврайи зякят ва садакьйир Аллагьди кьабул апIри ва аьхю ужара бикIри. Йиз фикриан, Аллагьу тялайикан фукIа ккун апIури, дюаь апIуз аьгъдрур адаршул. Исихъ ихь аьлимарин теклифниинди Гирами Кьур’андиз ва Мугьяммад пайгъамбарин суннайиз тялукь вуйи дюаь апIбан тахминан къайда туврача.
АльгьямдулилЛагьи Раббиль аьламин. Аллагьу масалли аьла Саййидина Мугьяммадин ва аьла али Саййидина Мугьяммадин ва саллим.
Я Рабби я Аллагь, фукьан зяифди вушра, ич гъахьи гъалатIар дюз алаъну, гьаму узу (учу) гъурху Кьур’андин сурйир, аятар кьабул апIина. Дурарин даража Мугьяммад пайгъамбарин (аьлайгьи салату вассаламдин) рюгьнахьна рубкьава. Адам абайин, Гьява бабан, варжна къанна юкьуд агъзур гирами пайгъамбрарин рюгьярихьна рубкьава, юкьби халифарин, юкьби имамарин, шейхарин, аьлимарин, устазарин, ургби тIарикьатарин агьларин рюгьярихьна рубкьава, ич абйир-бабарин, аьхю абйир-бабарин, чвйир-чйирин, ич гъулан йихну вуйи мяргьяматарин, Машрикьдиан Магърибдиз, Магърибдиан Машрикьдиз йихну вуйи вари чвйир-чйирин рюгьярихьна дурубкьну, Увура, дурарра учкан рази шлу агьларикан апIинава.
Я Рабби, йиз уьмриъ узуз аьгъядира, аьгъдардира гъафилвалар гъахьну, дурар апIбиин швумал вуза, дурар текрар дапIуз ният дапIну, тубайиз ккадакназа, Я Рабби, йиз туба кьабул дапIну, йиз гунгьарилан хил алдабгъа.
*****
Я Аллагь, йиз гъапIу дин-тIяаьт, дюз дарувалар кашра, дурар дюз алаъну, кьабул апIина. Узу йикIбан аьзабариккан, накьвдин аьзабариккан уьрхява. Узуз СиратIил гъяд яркьуди дибкка, душв’ин алдабгъу лик, ккутIубччвну вая кьяляхъ дубшну, узу жегьеннемдиз гъягърударикан мапIана, жегьеннем гьярам апIин, женнет кьисмат шлударикан апIин. Мягьшарин йигъан муъминарин жергейиъ шлударикан апIин. Йиз ккадахьу гъудгнарин, дидрисди имбу ушварин аьфи апIина. Йиз веледар дюзи рякъ’ин алаъ. Я Рабби, гьаму дюн’яйин бала-кьазйирихьан, нягьякь касдин фуктнийир-фигъларихьан, пис кьастар-ниятарихьан, иблисдин васвасайихьан, хпишиван макврихьан уьрхява. Гьарсар мусурман касдин ризкьна аьжал чан урчIарихъ шлубси апIин. Увухьна аьси духьну дюн’яйилан гъягърударикан мапIан, иман хьади гъягърударикан апIин. Дюзи рякъ’ин, аьгъдрубдиин алаъ. Ичра, ич абйир-бабаринра, аьхю абйир-бабаринра, йиз уьмрин юлдшинра, веледаринра, сижар абайин-бабанра аьфи апIин.
Я Рабби, ич йикIру йигъра ужуб апIин, иман кIваъ ади, шагьадат мелзниин алди дюн’яйилан гъягърударикан апIин.
АльгьямдулилЛагьи Раббиль аьламин. Аллагьу масалли аьла Саййидина Мугьяммадин ва аьла али Саййидина Мугьяммадин ва саллим.
Раббана атина фи дун’я гьясанатан ва фил ахирати гьясанатан вакьина аьзабаннар. Аллагьу масалли аьла Саййидина Мугьяммадин ва аьла али Саййидина Мугьяммадин вассалим.
(Фатигья.)
Кьюр вая артухъ касари дюаь апIруган, «узу», «йиз» гафарин ерина «учу», «ич» дупну ккунду.
Гъит ихь хайирлу ляхнариъ ва ниятариъ ухьуз Аллагь кюмек ишри!
