Наргиз Гюлечова

Дагъустандиъ гьясил гъапIу дюгдин ад республикайин гъирагъаризра удубчIвну. Улихьнаси Дагъустандин Глава Сергей Меликов ва республикайин правительствойин председатель Аьбдулмуслим Аьбдулмуслимов Урусатдин гъулан мяишатдин министр Дмитрий Патрушевдихъди гюрюшмиш гъахьнийи. Гюрюшдиъ гьял гъапIу асас месэла – Дагъустандин урзру жиларин комплекс артмиш апIуб вуйи.

Республикайиъ дюгю гьясил апIбан программайин иштиракчйирикан саб «КУМК» ООО мяишат ву. Думу мяишат ужудар хъуркьувалар улупури, дюгю гьясил апIбан цирклиъ улихь удубчIвна. Проектдин тешкилатчи Нурудин Уьмаровди ктибтганси, му
мяишатдиз гъийин йигъаз 1 агъзурна 200 гектар дюгю дузнайи хутIлар а.

«Думу кьадар хутIлариъ дюгю убзуз, мелиорацияйин федералин программайиъ иштирак хьували кюмек гъапIну. Программайин кюмекниинди деврин тIалабариз жаваб тувру инжинервалин гъурулушар тикмиш дапIна. Ич планариъ, дюгю тартиб апIру завод тикмиш апIубра айич. Проект гьязурди а», – гъапну Нурудин Уьмаровди.

Карханайиз Дагъустандин гъулан мяишатдин ва ипIру-убхъру сурсатарин министрин сарпи заместитель Шарип Шарипов, мяишатдиъ гъягъюрайи артмиш’валин ляхнарихъди таниш хьуз гъушнийи.

«Думу гизаф циркларикан ибарат вуйи мяшат ву. Мушваъ никк, никк гьясил апIура, мал-къара уьбхюра, малар урккру йишв, шюхъярин фабрика а. Гъи думу мяишат республикайин чIатху мяишарикан саб ву. Душваъ гъулан мяишатдин ужударсдар технологйир ишлетмиш апIура, дина тажрубайихъди таниш хьуз жара районариан мягьсулдарар гъюра.

Гьаму йисан республикайиъ 150 агъзур тонна дюгю ккадабцIбаз ккилигурахьа. Гьюкмин органари кьабул апIурайи уьчмйирин метлеб — Дагъустандин яшайишдинна экономикайин аьгьвалат заан дережайиз хувал ву», – гъапнийи
Шарип Шариповди.