Гюльнара Мягьямедова
14-пи сентябри Дагъустандин халкьарин сабвалин йигъан республикайин главайин вазифйир вахтназди тамам апIурайи Федор Щукинди хъуркьувалар гъазанмиш гъапIу дагъустанлуйир гьюкуматдин наградйириинди лишанлу гъапIну. Думу йигъан чпин баркаллу зегьметниинди, кьягьялвалиинди багъри юрд артмиш ва мюгькам апIурайидариз гьюрмат вуди шадлугънан серенжем кIули гъубшну.


Уч духьнайидарихьна илтIикIну, региондин кIулиъ айири Дагъустандин халкьарин сабвалин машквран мянайикан ктибтнийи.
«Гъи ухьу Дагъустандин халкьарин сабвалин йигъан гъаншариъ улихьна уч духьнахьа. Думу машквру саки 300 йис улихьна, ихь ата-бабйир сатIи духьну, чапхунчйирин кьушум дагъитмиш апIуб кIваина хура. Вари дагъустанлуйир багъри ругар уьрхюз кьягьяларси гъудужву 1999-пи йисандин гьядисйирра кIваин илмийихь», – гъапнийи Федор Щукинди.
Региондин кIулиъ айири къайд гъапIганси, халкьарин сабвал, женгарин читин йигъариси, бицIидариз дарсар кивру, инсанарин сагъламвал уьбхру, культура за апIру, ихь уртахъ хал – Дагъустан уьбхру гьар йигъандин зегьметнаъра рябкъюра. Гьаддиз думу йигъан республикайи чан ужудартIан ужудар пишекрарихьна вуйи гьюрмат улупуру.
Федор Щукинди яракь хилиъ ади азадвал ва ислягь уьмур гъюбхдарикан кIул’инди гъапнийи. Дугъу къайд гъапIганси, 1999-пи йисандин гьядисйирин иштиракчйирин игитваликан Урусатдин тарихдиъ гьаргандиз дибикIну гъубзди. Гьюрматнан гафар дугъу гьацира, абйирин ужудар аьдатар давам апIури, Ватандиз ва эскервалин буржи тамам апIбаз вафалувал улупурайи хусуси метлеб айи дявдин операцияйин иштиракчйирин адресназра гъапнийи.

 
Дарсар киврайи мялимарин, инсанар сагъ апIурайи духтрарин ва культура уьбхюрайи гъуллугъчйирин гьар йигъандин зегьметнакан улхури, региондин кIулиъ айири сабвал, дявдин женгариъси, ислягь зегьметнаъра лазим шулу, гъапнийи. «Мектебдин партайихъ инсанди чаз ярхи уьмур вуйибкьан лазим шлу аьгъювалар гъадагъуру. Мялим бицIидар аьхю уьмрихьна гьязур апIру кас ву, дугъан зегьметнан кьимат лап аьхюб ву», – аьлава гъапIнийи дугъу.
Федор Щукинди чан улхбаъ гьацира духтрарин, медицинайин кьялан гъуллугъчйирин, гьяракатниинди медицинайин кюмек тувру духтрарин, фельдшервалин пунктариъ лихурайидарин зегьметназра аьхю фикир тувнийи, илимдин ва культурайин гъуллугъчйирра, волонтерарра кIваина гъахнийи.

 
Серенжемдин аьхириъ Федор Щукинди ватандашар Дагъустандин халкьарин сабвалин йигъахъди тебрик гъапIнийи: «Гьюрматлу дустар! Гъи мушваъ жюрбежюр пишйирин ва миллетарин вакилар уч духьна. Учву вари Ватандин, республикайин ва багъри халкьдин гъуллугънаъ айивали ичв юкIвар саб апIура. Учву гьарсари Дагъустандин яшайишдинна экономикайин, образованиейинна культурайин артмиш’валик аьхю пай киврачва. Учвуз сагъвал, ислягьвал, пишекарвалин кIакIар мютIюгъ апIбаъ хъуркьувалар ва ичв хизанариз хушбахтвал ккун апIураза».

Серенжем зегьметнаъ хъуркьувалар гъазанмиш гъапIу ватандашариз наградйир тувбиинди ккудубкIнийи. Республикайин гьюрматнан ччвур тувдарин арайиъ Табасаран райондин образованиейин методист Изамет Гьяжиевара а. Газатдин редакцияйин терефнаан учу ихь ватанагьли заан хъуркьуваларихъди кIваантIан тебрик апIурача ва му важиблу гьядисайин гьякьнаан 8-пи машнаъ туврача.