Зубайдат Шябанова
23-пи апрели Табасаран райондиъ Хючна гъулан 1-пи нумрайин лицейин бинайиин райондин 9-10-пи классариъ урхурайидарин арайиъ математикайиан профессор Зейдулла Юзбеговдин ччвурнахъ вуйи шубубпи олимпиада кIули гъубшну.
Олимпиада Табасаран райондин глава Мягьямед Къурбановдин ва М.В. Ломоносовдин ччвурнахъ хъайи МГУ-йин жягьтлувалиинди муниципалитетдин, бажаранлу бицIидар ашкар апIбан ва дурар гьевесламиш апIбан метлеб ади гъабхурайиб ву.
Серенжем ачмиш апIуз Мягьямед Къурбанов, МГУ-йин мялим, профессор, экономикайин илмарин доктор Зейдулла Юзбегов, МГУ-йин мялим, электронный образованиейин дакьатарин артмиш’валин Центрин директор Денис Янышев ва жарадар гъафнийи.
«Ухьу гъабхурайи олимпиада аьхю мяна айиб ву. Диди мектебариъ урхурайидарин математикайихьна вуйи мумкинвалар артмиш апIуз, предмет дубгъуз гьевес хьуз, бажаранвал кайи бицIидар ашкар апIуз ва гьацира дурариз кюмек апIуз мумкинвал тувра. . Олимпиада гъабхури шубубпи раж ву, ва нубатнан этап республикайин дережайинуб шлувалиин умудлу вуза», – гъапнийи Мягьямед Къурбановди.
Зейдулла Юзбеговди, чан нубатнаъ, уч духьнайидар тебрикнан мани гафариинди къаршуламиш гъапIну, райондин главайи образованиейин цирклин артмиш’вализ аьхю фикир туврайиваликан гъапну.
«Гележегдиъ учу гьаму олимпиадайиъ иштирак хьуз ккунидариз варидариз теклиф апIурча. ГъалибвалтIан иштирак хьувал важиблу ву. Гьацира РД-йин образованиейин ва илимдин министерствойихъди ва райондин администрацияйихъди сатIиди Табасаран райондиъ математикайин бинайин республикайин мектеб абццуз планламиш апIурача. Му жягьтлувализ МГУ-йиъра ужуб кьимат тувну. Миди математикайин аьгъюваларин дережа за апIуз артухъси кюмек тувди», – гъапнийи Зейдулла Юзбеговди.
Олимпиадайиъ райондин 24 мектебдиан 37 урхурайир иштирак гъахьну. Гьял апIуз улупнайи табшуругъариз саб сяаьт тувнийи.
Натижайиъ райондин 10-пи классариъ урхурайидарин арайиъ сабпи йишв Ярса гъулан мектебдин вакил Мурад Ибрагьимовди, кьюбпи йишв Табасаран райондин гимназияйиъ урхурайи Мансур Гьяжимутелимовди, шубубпи йишв ЦIанак гъулан мектебдин ученик Тимур Мягьрамовди гъадабгъну.
Хъа 9-пи классариъ урхурайидарин арайиъ 1-пи йишван сагьиб Кюрягъ СОШ-дин вакил Амина Аьбдуллаева гъахьну. 2-пи йишв ТIивак гъулан мектебдиъ урхурайи Абубакар Аьзизов ва 3-пи йишв райондин гимназияйиъ урхурайи Фатима Гьясанова гъазанмиш гъапIну.
Олимпиадайин гъалибчйир ва призерар грамотйириинди ва пешкешариинди лишанлу гъапIну. Мидланра гъайри, олимпиадайин гъалибчйир ва дурариз дарс киву мялимар Табасаран райондин администрацияйи шубуд йигъаз пулсузди Москва шагьриз гьаъра. Дурар МГУ-йиз, меркездин машгьур ва тарихи йишвариз экскурсйириз гъягъиди.
Серенжемдин кьяляхъ Кюрягъ гъул’ан вуйи гъалибчи Алина Аьбдуллаевайи къайд гъапIганси, гьаму олимпиадайиъ иштирак хьувалиин вари урхурайидар лап разиди айи.
«Узу гъалибвалин сабпи йишв гъадабгъувалиин кIваантIан шад вуза. Йиз кIван гьевеснакан гьамусяаьт варидариз пуз ккундузуз. Гьюрматлу мектебариъ урхурайидар, аьгъювалар гъадагъай, вахт гьавайиди магьапIанай, мектебарихъан махъадаканай, дарсар урхай! Олимпиадйириъ, конкурсариъ иштирак хьувалин, гъалибвал гъадабгъувалин шаду гьиссарихъ хъубкьруб фукIара адар.
Узуз гьацира райондин глава Мягьямед Сиражудиновичдиз ва аьлим Зейдулла Гъадималиевичдиз урхурайидарин, абйир-бабарин, мялимарин терефнаан олимпиада тешкил апIбаз баркаллагь пуз ккундузуз. Му жюрейин серенжемари учук аьгъювалар гъадагъуз артухъди гьевес капIра, учу аьшкьламиш апIура», – гъапнийи ич сюгьбатнаъ Алина Аьбдуллаевайи.
